Kena Kima Kimbi mwena Ngeyi
Yakala wakumisa mukhetu, kima-kima, watela yandi ni nzodi wandi wa longu yi mpangi wandi wa mukhetu, wazimbula ni kenaku kima kimbi mwena yandi. Yandi wenina masamba makangwa, tho yanamikwa kidimbu, wa yandi kaka. Ku tsuka yandi wavutula, wabokila pfunzi amana wayafulula masamba mana yandi-meni.
4 1Abweti wenina kitoku, nzodi wama, abweti wenina kitoku kwaku! Mesu maku menina mayembi ku manima ma mvwela yaku. Tsuki zaku zenina bwosu kibuka kya bakhombu kina kikulumuka tuka ku malondi ma Ngileyadi. 2Menu maku menina bwosu kibuka kya mikoku mina myázengwa tsuki nana, mina myátombuka tuka ku sukula; kosu mukoku wisi buta bana babole, amana keti mukoku mosi wukondi mwana. 3Malebu maku menina bwosu musinga wa kabengi, amana munwa waku wenina kitoku. Matama maku menina bwosu ndambu za ngelenadi ku manima ma mvwela yaku. 4Tsingu yaku yenina bwosu kibaka kya Tavidi, kina bátunga mu malongo ma matadi; hana thandu yandi bazitiki bibalaka 1.000, kosu kimosi kibalaka kya suta. 5Mayeni maku mamole menina bwosu bana babole ba mbambi, bana ba mbutukulu yimosi ba mbambi, bina bisi dya hana kati dya bithundu. 6Nate kilumbu kisi hema amana mididi mitina, meni kayénda ku mongu wa mila amana ku londi dya pfwabidi. 7Wenina kitoku kwaku kwosu, nzodi wama; kenaku kima kimbi mwena ngeyi.
8Wisa yi meni tuka ku Lebanoni, nzodi wama wa longu; wisa yi meni tuka ku Lebanoni. Tala ku tsi tuka ha nsongi ya Amana, tuka ha nsongi ya Seniri yi Helemoni, tuka ku binzenzi bya bathambu, tuka ku myongu, bifulu bya zingo. 9Wábonga mbundu yama, phangi wama wa mukhetu, nzodi wama wa longu; wábonga mbundu yama ni thala yimosi ya mesu maku, ni ditadi dimosi dya nsinga waku wa tsingu. 10Abweti lungongu lwaku lwenina kitoku, phangi wama wa mukhetu, nzodi wama wa longu! Abweti lungongu lwaku luluti kitoku kuluta vinu, amana mvumba ya masi maku yiluti mananasi mosu! 11Malebu maku masi tona bwiki, nzodi wama wa longu; bwiki yi midiki bina ku tsi ya lulaka lwaku, amana mvumba ya miledi myaku yenina bwosu mvumba ya Lebanoni.
12Kilanga kya kuphata kyenina phangi wama wa mukhetu, nzodi wama wa longu, tho ya kuphata, tho ya kunamika. 13Mihandi myaku menina kilanga kya ngelenadi yi bibundu bilutini kitoku, heni yi nadi, 14nadi yi safaloni, kalamusi yi sinamoni, yi miti myosu mya pfwabidi, mila yi aluwesi, yi mananasi moosu malutini kitoku. a a v14 Kalamusi kenina nkenge wa nsudi ya kitoku, wuna bisi sadila bonga mananasi. 15Wenina tho ya kilanga, dibulu dya mamba ma luzingu, amana banzadi bina bisi tika tuka ku Lebanoni. 16Tokama, pfunzi ya ku londi, amana wisa, pfunzi ya ku banda! Hema hana thandu ya kilanga kyama, hanga mananasi mandi matika. Nzodi wama kakota muna kilanga kyandi amana kadya bibundu byandi bilutini kitoku.
