Kilumbu kya longu lwa kyamvu
Mukhetu wasanda mbanza ya phipha mu kusanda wuna moya wandi wisi zola, wahyula batsinzidi, buna wamuwana amana kazola kumuyambula ku nate wamunata ku nzu ya ngudi wandi. Buna ndinga zahika zitala thangi ya kunata ya Solumoni yina yakebwa yisi bwelama, kyamvu wavwikwa mpu mu kilumbu kya longu dyandi.
3 1Hana thangi yama muna phipha yosu, yásanda wuna moya wama wisi zola; yámusanda, kaasi yámuwanaku. 2Buthwena yikatélama, yíkangala muna mbanza, muna mabala-bala yi mazandu; yísanda wuna moya wama wisi zola. Yámusanda, kaasi yámuwanaku. 3Batsinzidi bawani meni bwosu bakala kangala muna mbanza. «Wumoni wuna moya wama wisi zola?» 4Mu phasi yáluta kwa bawu, amana yáwana wuna moya wama wisi zola. Yámusimbidila, amana yázolaku kumuyambula, nate yámunata ku nzu ya ngudi wama, ku mwanza wa wuna wábuta meni. 5Yikulusyamisa, benu bandumba ba Yelusalemi, mu bakayi yi mikoku mya nganga: lukasikumunaku keti lukokumunaku lungongu, nate lwazolakana lwawu-meni.
6Nani wawu wisa katuka ku nganga, hanga biyungila bya mwisi, wasitu mananasi ma mila yi pfwabidi, ni mananasi moosu ma tsudi ya kitoku ma muteki? 7Tala — yina thangi ya kunata ya Solumoni yandi-meni, yizyungulu kwa bayakala ba ngolu makumasambanu, muna bayakala ba ngolu ba Kiseledi, 8Bawu boosu basimbidila mbedi za phoku, basasukila mu kunwana, kosu mutu yi mbedi yandi ha kabeta kandi, mu kukatula bweya bwa phipha. 9Kyamvu Solumoni wáyidikila thangi ya kunata ya yandi-meni ni miti mya Libani. 10Wákidika makunzi mandi ni phalata, manima mandi ni wolu, kiti kyandi ni kabengi; kati dyandi dyákidikwa ni lungongu kwa bandumba ba Yelusalemi. 11Lubukenu, benu bandumba ba Siyoni, amana lutala kyamvu Solumoni, wuvwata mukhonzi wuna ngudi yandi wámuvwatisa muna kilumbu kya longu lwandi, muna kilumbu kina mbundu yandi yásangwala.
