Chubar Kinungtsü Anogo
Tetsüri ammang yimti nung pa meimba nisung tepiyong, mitertem dang asüngdang, anungji pa angua pa tetsü ki dang bener arutsü tashi pa odaktsü meinyaktsü. Idangji jara olatemi Solomon anisüngzükba meyong aruba angur, chuba pa tetsübutsü anogo nung pei kinungtsüba.
3 1Kü yipten nung ammang tepiyong, kü nelai meimba ni bushi; ni pa bushi, saka ni pa mangu. 2Tang ni apusoa yimti nung senzütsü, yimdong aser yimtongtem ajanga; kü nelai meimba ni bushitsü. Ni pa bushi, saka ni pa mangu. 3Yimti meketa senzüya alidang mitertemi ni angu. “Kü nelai meimba na angu ma?” 4Ni parnok jungjunga süia, kü nelai meimba ni angu. Kütsü ki dang, ni abenba taktang dang ni pa bener aru tashi, ni pa apu aser pa odaktsü meinyak. 5Yirusalem jalatem, alu nung aliba mesü aser shio tenüng, ni nenok dang mela, aji pela tashi, nenoki temeim teajongshi mesüra teawak.
6Mokozü tangula ama, mozü aser liangmesen agi menemba, oset yoktsüba teronem menemtsü tila ajak den, lisem lima nungi atuba ibaji shir? 7Ajiang—iba Solomon meyong amentsü lir, iba meketa Israel tashi tulurtem nungi tashi tulur roker noktak. 8Parnok ajaki rara asoshi tazüoktet, aonung tetsübutsü anema, nisung shia pei nok pei tsütsü nung amer. 9Solomon chubai Lebanon süng agi pei sasa asoshi amentsü ka yanglu. 10Pai iba tongshi taribi agi yanglu, iba atena hon agi, iba amentsü nakrema meremba agi; iba telunglenji Yirusalem jalatemi temeim agi mesanga ayu. 11Zion jalatem, adoka arung, aser pa tetsüi pa kinungtsü anogo nung, pa mulung pela anogo nung, pa kolak nung ayuba korang abena aliba Solomon chuba reprangang.