Chobaeibü Yak Lebü Chalou
Saoei sangnyu banyua haoei sanoubü laobou lamkei, lapheibü shuong to phekei, kheijinei hao hapkei hoba hao nyueibü chem to leian loula asühshongko hao hatlepkei. Kheijinei lubü ngüh shuongei Solomon lapan kibü setshang lapda chühkei, haoeibü lemlabü chalou ka Choba thaonyu chandinan kibü.
3 1Kü laoboua khüyou pendou ngeibü soushouei sanoubü laobou ngei lambei; ngei hao lambei, lausikei ngei hao ahapbei. 2Tou ngo loenan sangnyua danthetjung haulabü, khongnyua hoba pühlama; ngeibü soushouei sanoubü laobou ngei lamlabü. Ngei hao lambei, lausikei ngei hao ahapbei. 3Lapheibü shuongei sangnyua danthetjung haujinei ngo hapbei. “Ngeibü soushouei sanoubü laobou kan hapkei lo?” 4Ngei haoen maisho danjung hauan ngeibü soushouei sanoubü laobou ngei hapbei. Ngei hao hatlepbei, kü nyueibü chem to ngei hao leian loula asühshongko ngei hao ohautikei, ngo künbü saoeibü shemjang to. 5Jerusalembü nouyangshou shuong, seka kibü meishi hoba saak danko ngei kan to sakkuko lenda: sanou to athungjan ayingsi apitijan, kho pienbü asühshongko.
6Khübü ka angko loubü, wankhük sangmei tegü, ponlemhibü hoba jen danko shikmei maibü, namseibüeibü shikmei maitibü pendouei, ho ao kia? 7Chühashi—kho Solomon lolo setshang kia, kho kaijembo lakjaibü shuong saosem yoa, Israelbü lakjaibü shuong ka, 8haoen pendou in hatan, wapyola leiyenbü, mütpem weko lulueibü in jembü chaang ae, khüyou hatbümokbü shanga shouan. 9Solomon Chobaei hao shanga setshang che, Lebanon kabü buei kümbei. 10Haoei khoeibü thaonyu chandinamei kümbei, khoeibü phai honei, khoeibü setla shang nakthüngbü sakbüei; khoeibü maangae Jerusalembü nouyangshou shuongei sanou danko inla kümbei. 11Zion nouyangshou shuong, longashi, hoba Solomon Choba to chühashi, haonyuei hao thüka hankukei khun sean, haoeibü yak lebü chaloua, haoeibü maang olinbü chaloua.
