Ntsiku ya Malowozi a Mambo
Nkazi asasaka ule anamfuna mu nzinda wa mdima, abvundza alindiri, buluka angumana iye mbakhonda kuntawira kuenda mpaka kumpita ku nyumba ya mai wace. Buluka maphokoso anango asaona ngolo ya Salomoni yakutsidzikizwa ikufendedzera, mambo mbakhala na korowa pa ntsiku ya ukwati wace.
3 1Pa ntanda panga mu masiku onsene ndidamusaka ule anafunwa na moyo wanga; ndidamusaka, mbwenye nee ndamugumana tayu. 2Cincino ndinalamuka mbandizungulira nzinda, kupita m'miseu na m'mabwalo; ndinansaka ule anafunwa na moyo wanga. Ndidamusaka, mbwenye nee ndamugumana tayu. 3Alindiri andigumana mukhazungulira iwo n'nzinda. “Mwamuona ule anafunwa na moyo wanga?” 4Pidangopita ine iwo basi, ndamugumana ule anafunwa na moyo wanga. Ndamuphata mbandikhonda kunthawisa mpaka pidaenda ine naye ku nyumba ya mai wanga, ku cipinda ca ule adandibala. 5Ndisakudandaulirani, imwe ana a akazi a Yerusalemu, thangwi ya mbawala na nswala za kuthando: lekani kupfutumusa peno kulamusa kufuna mpaka n'dzidzi wace unadzafika.
6Mbani uyu anakwira kubuluka ku thando ninga mizati ya utsi, wakununkhizwa na mira na ubani, na ufa onsene wakununkhira wa nyamalonda? 7Onani—ndi machila wa Salomoni ene, wakuzungulirwa na amuna amphambvu makumatanthatu, mu anyankhondo a Izarayeli, 8Onsene aphata masupada, apfundzika nkhondo, m'bodzi na m'bodzi na supada yace pakhundu pace, toera kutsidzikiza ku kugopsa kwa masiku. 9Mambo Salomoni adacitira machila ekhene na miti ya ku Lebhanoni. 10Adacita mizati yace na parata, nsana wace na ouro, mpando wace na nguwo zakufubvu; n'kati mwace mukhasasanyirwa mwakufuna na ana a akazi a Yerusalemu. 11Bulukani, imwe ana a akazi a Siyoni, mbamuyang'ana Mambo Salomoni, akhabvala nthimba adamubvazika mai wace pa ntsiku ya malowozi ace, pa ntsiku idakomerwa ntima wace.
