Awit sa mga Awit 3

3 ¹Sa akong higdaanan sa tibuok gabii gipangita ko ang gihigugma sa akong kalag; gipangita ko siya, apan wala ko siya makaplagi. ²Karon mobangon ako ug maglibotlibot sa siyudad, agi sa mga dalan ug sa mga plasa; pangitaon ko ang gihigugma sa akong kalag. Gipangita ko siya, apan wala ko siya makaplagi. ³Nakita ako sa mga magbalantay samtang naglibot sila sa siyudad. “Nakita ba ninyo ang gihigugma sa akong kalag?” ⁴Halos wala pa ako makalabay kanila dihang nakaplagan ko ang gihigugma sa akong kalag. Gigunitan ko siya ug wala ko siya buhii hangtod nga nadala ko siya sa balay sa akong inahan, sa lawak sa nagmabdos kanako. ⁵Nagmando ako kaninyo, mga anak nga babaye sa Jerusalem, pinaagi sa mga lagsaw ug sa mga usa sa kapatagan: ayaw ninyo pukawa o kutawa ang gugma hangtod nga kini motugot.

⁶Kinsa ba kini nga nagpadulong gikan sa kamingawan nga daw mga haligi sa aso, pinahumotan sa mira ug sa insenso, uban sa tanang mahumot nga pulbos sa magpapatigayon? ⁷Tan-awa—mao kini ang kaugalingong karwahe ni Solomon, nga gilibotan sa kan-uman ka kusgang tawo, sa mga kusgan nga tawo sa Israel, ⁸silang tanan nagkupot ug mga espada, hanas sa gubat, ang matag usa adunay espada sa iyang kiliran, batok sa kalisang sa kagabhion. ⁹Si Haring Solomon naghimo alang sa iyang kaugalingon ug usa ka karwahe gikan sa kahoy sa Lebanon. ¹⁰Gihimo niya ang mga haligi niini gikan sa plata, ang likod niini gikan sa bulawan, ang lingkoranan niini gikan sa tapul; ang sulod niini mahigugmaong gidayandayanan sa mga anak nga babaye sa Jerusalem. ¹¹Panggula, mga anak nga babaye sa Zion, ug sud-onga si Haring Solomon, nga nagsul-ob sa korona nga gibutang kaniya sa iyang inahan sa adlaw sa iyang kasal, sa adlaw nga nagmaya ang iyang kasingkasing.