د بادشاه د واده ورځ
ښځه په تياره ښار کې د هغه چا لټون کوي چې ورسره مينه لري، له څوکيدارانو پوښتنه کوي، بيا يې پيدا کوي او تر هغه يې نه پرېږدي چې د خپلې مور کور ته يې راولي. بيا نور غږونه ګوري چې د سليمان ساتل شوې ګاډۍ را نږدې کېږي، او پاچا د خپل واده په ورځ تاج پر سر لري.
3 1په خپل بستر کښې د ټولې شپې ما هغه ولټولو چې زما روح ورسره مينه لرى؛ ما هغه ولټولو، خو هغه مې ونۀ موندلو. 2اوس به زۀ پاڅم او په ښار کښې به ګرځم، په کوڅو او ميدانونو کښې؛ هغه به لټوم چې زما روح ورسره مينه لرى. ما هغه ولټولو، خو هغه مې ونۀ موندلو. 3پهره دارانو زۀ وموندلم کله چې هغوئ د ښار ګزمه کوله. ”تاسو هغه ليدلے دے چې زما روح ورسره مينه لرى؟“ 4زۀ لا ترې لږ تېر شوے وم چې ما هغه وموندلو چې زما روح ورسره مينه لرى. ما هغه ونيولو او پرېنښودو مې نۀ، ترڅو چې هغه مې د خپلې مور کور ته راوستلو، د هغې خونې ته چې زۀ يې زېږولے وم. 5اے د يروشلم لوڼو، زۀ تاسو ته د هوسيو او د دښتې د آهوګانو په قسم ورکوم چې: مينه مۀ راپاروئ او مۀ راويښوئ تر هغې چې پخپله خوښه شى.
6دا څوک دے چې د بيابان نه راخيژى، د لوګى د ستنو په شان، په مُر او لوبان معطر شوے، د سوداګر د ټولو خوشبودارو عطرو سره؟ 7ګورئ—دا د سليمان خپله پالکۍ ده، د هغې چاپېره شپېته زورور سړى دى، د اِسرائيل د زورورو سړيو نه، 8دا ټول توره وال دى، د جنګ دپاره روزل شوى، هر يو خپله توره تر خپل څنګ لرى، د شپې د وېرې په مقابله کښې. 9سليمان بادشاه خپل دپاره د لبنان د لرګيو نه يوه پالکۍ جوړه کړه. 10د هغې ستنې يې د سپينو زرو جوړې کړې، د هغې شا د سرو زرو، د هغې ناسته د ارغوانى رنګ؛ د هغې دننه د يروشلم د لوڼو په واسطه په مينه سره سينګار شوے وو. 11اے د صيون لوڼو، راووځئ، او سليمان بادشاه ته وګورئ، چې هغه تاج يې په سر دے چې د هغۀ مور يې د واده په ورځ ورباندې کېښودو، په هغه ورځ چې د هغۀ زړۀ خوشحاله شو.
