Shohning toʻy kuni

Ayol sevgan yorini qorong'i shahar bo'ylab izlaydi, qorovullardan so'raydi, so'ng uni topib, onasining uyiga olib bormaguncha qo'yib yubormaydi. Keyin boshqa ovozlar Sulaymonning qo'riqlangan aravasi yaqinlashib kelayotganini kuzatadi: shoh to'y kunida toj kiygan.

3-bob.

Tun boʻyi oʻrnimda qalbim sevgan yorni izladim; uni izladim, lekin topolmadim. Endi turib, shaharni — koʻchalar va maydonlarni aylanib chiqaman; qalbim sevgan yorni izlayman. Uni izladim, lekin topolmadim. Shaharni aylanib yurgan qorovullar meni topishdi. “Qalbim sevgan yorni koʻrdingizmi?” Ulardan endigina oʻtgan edimki, qalbim sevgan yorni topdim. Uni mahkam ushlab oldim va onamning uyiga, meni dunyoga keltirgan onaning xonasiga olib kelmagunimcha, uni qoʻyib yubormadim. Sizlarga qattiq tayinlayman, ey Quddus qizlari, dala jayranlari va ohulari haqi: sevgini oʻz vaqti kelmaguncha qoʻzgʻatmang ham, uygʻotmang ham.

Biyobondan tutun ustunlariday koʻtarilib kelayotgan bu kim? Mirra va ladan bilan, savdogarning har xil muattar kukunlari bilan xushboʻylangan? Mana — bu Sulaymonning oʻz taxtiravoni, uning atrofida Isroil bahodirlaridan oltmishta bahodir, Ularning bari qilich tutgan, jangga oʻrgatilgan; har biri tungi dahshatga qarshi qilichini beliga osgan. Shoh Sulaymon oʻziga Lubnon yogʻochidan taxtiravon yasatdi. Uning ustunlarini kumushdan, suyanchigʻini oltindan, oʻtirgʻichini argʻuvondan yasadi; ichki qismini Quddus qizlari mehr bilan bezashdi. Chiqinglar, ey Sion qizlari, shoh Sulaymonga boqinglar — boshida onasi uning toʻy kunida, qalbi shod boʻlgan oʻsha kunda kiygizgan toj bilan.