Song of Solomon 3 FHB Father's Heart Bible™

3 ¹Rati bhor moi laga bisna te moi laga mon pora morom kora jon ke moi bisarise; moi tar ke bisarise, kintu moi tar ke panai. ²Etiya moi uthi kene sheher te ghuri berabo, rasta khan aru chowk khan te; moi laga mon pora morom kora jon ke moi bisaribo. Moi tar ke bisarise, kintu moi tar ke panai. ³Sheher te ghuri phura kori thaka pohora diya manuh khan pora, tarkhan ghuri phura kori thaka homoi te moi ke pai loise. “Moi laga mon pora morom kora jon ke tumi dikhise na?” ⁴Moi tarkhan ke paar kora loge-loge te moi laga mon pora morom kora jon ke moi paise. Moi tar ke dhori loise, tar ke jabo diya nai, jitia tak moi tar ke moi laga ama laga ghor te ani loise, moi ke jonom diya jon laga kamra te. ⁵He Jerusalem laga chukri khan, jongol laga horin aru horini khan laga kosom di kene moi tumikhan ke hukum di ase: morom ke na-uthaabi aru na-jagaabi, jitia tak eitu nijor itcha nakore.

⁶Sukha jagah pora, dhuwa laga khamba khan nisena, myrrh aru dhuna laga sugandh pora bhorta hoi kene, beopari laga sob sugandhi dhuli khan logote, uthi aha eitu kun ase? ⁷Sabi—eitu Solomon laga nijor palki ase, eitu laga charos te Israel laga veer manuh khan laga majot pora saathi jon veer manuh khan ase, ⁸Tarkhan sob talwar dhori rakhise, lorai karne shikhi loise, sob jon laga talwar tar kinar te bandhi rakhise, rati laga bhoi pora bachibole karne. ⁹Raja Solomon pora nijor karne Lebanon laga kath pora ekta palki bonaise. ¹⁰Tai eitu laga khamba khan chandi pora bonaise, eitu laga pich phale suna pora, eitu laga bohai jaga beguni rong pora; eitu laga bhitor Jerusalem laga chukri khan pora morom pora sajai dise. ¹¹He Zion laga chukri khan, bahar te ulai ahibi, aru Raja Solomon ke sabi, tar ama pora tar matha te lagai diya mukut pindhi kene, tar shadi laga din te, tar mon khushi huwa din te.