Song of Solomon 4 FHB Father's Heart Bible™

4 ¹Tumi kiman sundur ase, moi laga morom, tumi kiman sundur ase! Tumar mukh-dhaka laga pichete tumar suku khan kopou chiriya nisina ase. Tumar chuli tu Gilead pahar pora nami aha chagol-jhak nisina ase. ²Tumar daat khan notun pashom kata meri-jhak dhula pora uthi aha nisina ase, sob tu juwa bacha jonom diya, aru tarkhan majote ekta bhi tar bacha herpa nai. ³Tumar oth tu lal-rong suta nisina ase, aru tumar mukh tu sundur ase. Tumar gaal tu tumar mukh-dhaka laga pichete adha kata dalim nisina ase. ⁴Tumar gola tu David laga burz nisina ase, pathor khan line-line pora bona; etu uporte 1,000 dhal latkai ase, sob tu bir sipahi laga dhal ase. ⁵Tumar duita buku tu duita horin-bacha nisina ase, horin laga juwa bacha, jun khan lily phul majote ghas khai ase. ⁶Din pora saah nolua tak aru chaya khan polai nojua tak, moi gandha-rosh laga pahar te aru dhoop laga tila te jabo. ⁷Tumi puro sundur ase, moi laga morom; tumi te eku golti nai.

⁸Lebanon pora moi logote ahibi, moi laga konya; Lebanon pora moi logote ahibi. Amana laga chuti pora nichete sabi, Senir aru Hermon laga chuti pora, singho khan laga gufa pora, cheta-bagh khan thaka pahar pora. ⁹Tumi moi laga mon churai loise, moi laga bhoini, moi laga konya; tumar suku laga ekbar sa-a pora, tumar gola-har laga ekta moni pora tumi moi laga mon churai loise. ¹⁰Tumar morom kiman sundur ase, moi laga bhoini, moi laga konya! Tumar morom tu angur-ros pora kiman bhal ase, aru tumar tel laga khushbu sob masala pora bhi bhal ase! ¹¹Tumar oth pora modhu-ros chuwai ase, moi laga konya; modhu aru gakhir tumar jiba laga nichete ase, aru tumar kapra laga khushbu Lebanon laga khushbu nisina ase.

¹²Tala mara bagan tu moi laga bhoini, moi laga konya ase, ekta tala mara jhorna, ekta mohor diya pani-kuwa ase. ¹³Tumar daal khan dalim laga bagan ase, sob pora bhal phol khan logote, mehndi aru nard logote, ¹⁴nard aru kesar, sugandhi-nol aru dalchini, dhoop laga sob gash logote, gandha-rosh aru agar logote, sob pora bhal masala khan logote. ^a a v14 Sugandhi-nol tu ekta mitha gandha thaka nol ase, juntu masala hisab-te cholai. ¹⁵Tumi bagan laga pani-kuwa ase, jinda pani laga kuwa ase, aru Lebanon pora boi aha pani-nala khan ase. ¹⁶Uttor phale laga hawa, uthibi, aru dakshin phale laga hawa, ahibi! Moi laga bagan uporte saah dibi, titia etu laga khushbu ulai jabo. Moi laga morom-jon tar nijor bagan te ahibi, aru etu laga sob pora bhal phol khabi.