ማሕልየ መሓልይ 4

4 ¹ውዴ ሆይ፣ እንዴት ውብ ነሽ፤ እንዴት ውብ ነሽ! ዐይኖችሽ ከመሸፈኛሽ ጀርባ ያሉ ርግቦች ናቸው። ጠጒርሽ ከገለዓድ ተራራ ተዳፋት የሚንደረደር የፍየሎች መንጋ ይመስላል። ²ጥርሶችሽ አሁን ተሸልተው ከመታጠቢያ እንደሚወጡ የበጎች መንጋ ናቸው፤ እያንዳንዷ መንታ የወለደች ናት፤ ከእነርሱም መካከል ልጅ ያጣች አንዲትም የለችም። ³ከንፈሮችሽ እንደ ደማቅ ቀይ ክር ናቸው፤ አፍሽም ያማረ ነው። ጒንጮችሽ ከመሸፈኛሽ ጀርባ እንደ ተከፈለ ሮማን ናቸው። ⁴አንገትሽ እንደ ዳዊት ግንብ ነው፤ በድንጋይ ረድፎች የተሠራ ነው፤ ሺህ ጋሻዎችም በእርሱ ላይ ተሰቅለዋል፤ ሁሉም የጦረኞች ጋሻ ናቸው። ⁵ሁለቱ ጡቶችሽ በአበቦች መካከል እንደሚሰማሩ ሁለት የሚዳቋ ግልገሎች፣ የሚዳቋ መንታዎች ናቸው። ⁶ቀኑ እስኪነፍስ ጥላዎቹም እስኪሸሹ ድረስ፣ ወደ ከርቤ ተራራ፣ ወደ ዕጣን ኮረብታም እሄዳለሁ። ⁷ውዴ ሆይ፣ ፍጹም ውብ ነሽ፤ በአንቺም ምንም ነውር የለም።

⁸ሙሽራዬ ሆይ፣ ከሊባኖስ ከእኔ ጋር ነዪ፤ ከሊባኖስ ከእኔ ጋር ነዪ። ከአማና ጫፍ፣ ከሴኔርና ከኤርሞን ጫፍ፣ ከአንበሶች ጒረኖ፣ ከነብሮች ተራራ መኖሪያ ዝቅ ብለሽ ተመልከች። ⁹እኅቴ፣ ሙሽራዬ ሆይ፣ ልቤን ማረክሽው፤ በአንዲት የዐይንሽ ቅጽበት፣ በአንዲት የአንገትሽ ሐብል ዕንቍ ልቤን ማረክሽው። ¹⁰እኅቴ፣ ሙሽራዬ ሆይ፣ ፍቅርሽ እንዴት ውብ ነው! ፍቅርሽ ከወይን ጠጅ እንዴት ይበልጣል፤ የሽቶዎችሽም መዐዛ ከማንኛውም ሽቱ ይበልጣል። ¹¹ሙሽራዬ ሆይ፣ ከንፈሮችሽ ማር ያንጠፈጥፋሉ፤ ማርና ወተት ከምላስሽ ሥር ናቸው፤ የልብስሽም መዐዛ እንደ ሊባኖስ መዐዛ ነው።

¹²እኅቴ፣ ሙሽራዬ የተቈለፈ የአትክልት ስፍራ ናት፤ የተቈለፈ ምንጭ፣ የታተመ ፈሳሽ ናት። ¹³ቅርንጫፎችሽ ምርጥ ፍሬዎች ያሉት የሮማን አትክልት ናቸው፤ ሄናና ናርዶስ፣ ¹⁴ናርዶስና ዛዕፈራን፣ ቃሊሞስና ቀረፋ፣ ከዕጣን ዛፍ ሁሉ ጋር፣ ከከርቤና ከእሬት ጋር፣ ከሁሉም ምርጥ ሽቱዎች ጋር። ^a a v14 ቃሊሞስ እንደ ሽቱ የሚያገለግል ጥሩ መዐዛ ያለው ሸምበቆ ነው። ¹⁵አንቺ የአትክልት ስፍራ ምንጭ፣ የሕያው ውሃ ጒድጓድ ነሽ፤ ከሊባኖስም የሚወርዱ ፈሳሾች ነሽ። ¹⁶ሰሜናዊ ነፋስ ሆይ፣ ንቃ፤ ደቡባዊ ነፋስ ሆይ፣ ና! በአትክልቴ ላይ ንፈስ፤ ሽቱዎቹ እንዲፈሱ አድርግ። ውዴ ወደ አትክልቱ ይምጣ፤ ምርጥ ፍሬዎቹንም ይብላ።