Kifuma Kele Ve na Nge
Bakala ke kembila kento, kitini na kitini, ke tuba ti yandi kele nkento ya makwela ya yandi mpe mpangi ya yandi, ti kifuma kele ve na yandi. Yandi kele kilanga ya kukanga, nto ya maza ya kukangama kinyemo, ya yandi kaka. Na nsuka, kento ke vutula, ke bokila mupepe mpe ke zibula kilanga yina yandi mosi.
4 1Nge kele kitoko mingi, mpangi ya munu ya luzolo, nge kele kitoko mingi! Meso ya nge kele mabembe na manima ya lele ya nge. Nsuki ya nge kele mutindu kibuka ya bankombo yina ke kulumuka na mwa myongo ya Ngalaade. 2Meno ya nge kele mutindu kibuka ya bameme yina ba me katula nsuki, yina ke basika na maza ya kusukula, konso mosi ke buta mapasa, mpe ata mosi na kati ya bawu me vidisa mwana ya yandi ve. 3Bikoba ya nge kele mutindu singa ya mbwaki, mpe yinwa ya nge kele kitoko. Mabundi ya nge kele mutindu bitini ya ngelenade na manima ya lele ya nge. 4Laka ya nge kele mutindu nzo ya mutela ya yinda ya Davidi, yina ba tungaka na milonga ya matadi; na zulu ya yawu ba me ledika binwanunu funda (1 000), konso kimosi kele kinwanunu ya kinwani. 5Mabene ya nge zole kele mutindu bana zole ya nkabi, mapasa ya nsyesye, yina ke dya na kati ya bifulu. 6Tii ntangu kilumbu ke wumuna mpe mpewo ke tina, mu ke kwenda na mongo ya mile mpe na mwa mongo ya maaka ya nsunga ya mbote. 7Nge kele kitoko na mambu nyonso, mpangi ya munu ya luzolo; kifuma kele ve na nge.
8Kwiza na munu, katuka na Libane, nkento ya munu ya makwela; kwiza na munu, katuka na Libane. Tala na nsi katuka na nsongi ya Amana, katuka na nsongi ya Senile mpe Elemone, katuka na mabulu ya bankosi, katuka na myongo, bisika yina bango ke zingaka. 9Nge me baka ntima ya munu, mpangi ya munu ya kento, nkento ya munu ya makwela; nge me baka ntima ya munu na kutala mosi ya meso ya nge, na ditadi mosi ya ntalu ya musanga ya nge. 10Luzolo ya nge kele kitoko mingi, mpangi ya munu ya kento, nkento ya munu ya makwela! Luzolo ya nge kele mbote kuluta vinu, mpe nsunga ya mafuta ya nge kele mbote kuluta mananasi nyonso ya nsunga! 11Bikoba ya nge ke toloka mafuta ya nyosi ya kitoko, nkento ya munu ya makwela; mafuta ya nyosi mpe miliki kele na yisi ya ludimi ya nge, mpe nsunga ya bilele ya nge kele mutindu nsunga ya Libane.
12Bilanga ya kukangama kele mpangi ya munu ya kento, nkento ya munu ya makwela, nto ya maza ya kukangama, yinto yina ba me tula kinyemo. 13Bintala ya nge kele kilanga ya bangelenade na bambuma ya kulutila kitoko, ena na nale, 14nale na safela, kalamise na kanele, na konso yinti ya maaka ya nsunga ya mbote, mile na alowese, na mananasi nyonso ya nsunga ya kulutila kitoko. a a v14 Kalamise kele lusende ya nsunga ya mbote yina ba ke sadilaka bonso mananasi ya nsunga. 15Nge kele yinto ya bilanga, dibulu ya maza ya moyo, mpe mizumba ya maza yina ke kulumuka katuka na Libane. 16Vumbuka, mupepe ya node, mpe kwiza, mupepe ya sude! Fula na zulu ya bilanga ya munu, samu ti mananasi ya nsunga ya yawu kumwangana. Bika ti muzolwa ya munu kukota na bilanga ya yandi mpe kudya bambuma ya yawu ya kulutila kitoko.