Ma Mi Peruut Age Eng' Inyee
Lasei muren kwony, kopartoi partoi, kuurei ineendet murereennyi ak chepkamennyi, kole ma mi peruut age tugul eng' ineendet. Ko mbareet ne kiger, ole punu peek ne kinorochin, nenyi kityo. Eng' let kowolji ineendet, kuurei usoonaik ak koyaat mbareennyi ineegei.
4 1Korooron ne tya inyee, chamanennyu, korooron ne tya inyee! Konyekyuk ko cheptugenik eng' let moingeng'ung'. Suumeeguk ko uu akweetap ng'oroorek che choorugei eng' chepkeigeusyegap Gilead. 2Keleguk ko uu akweetap keechiirek che kagicher suumeekwak, che pwoonei kobunu ole kiuunegei, che tinyei sarameek age tugul, ak ma mi age among icheek ne kabet lagoonnyi. 3Kuting'ung' ko uu porowet ne piriir, ak karaaran kuting'ung'. Tagilgiliguk ko uu kebebertosyegap logoiyat eng' let moingeng'ung'. 4Kaating'ung' ko uu toweetap Daudi, ne kiteech eng' ortinwegap koik; kisonginine oriit long'onik eliphu agenge, long'eet age tugul ko long'eetap murenik. 5Kinaiguk aeng' ko uu lagok aeng', sarameegap kenyeleet, che iyagisyei among taaptook. 6Agoi koit peetuut ak kolabat urwosyek, awe tulweetap mwanik ak tuloitap tuguuk che nyamdut. 7Korooron inyee eng' tugul, chamanennyu; ma mi peruut age tugul eng' inyee.
8Nyoo kobooto anee kobunu Lebanon, murereennyu; nyoo kobooto anee kobunu Lebanon. Ing'ururen kobunu tulweetap Amana, kobunu tulweetap Senir ak Hermon, kobunu keriingonigap ng'etuunyik, kobunu tuloonook che menye merotosyek. 9Kaname muguleldanyu, chepkamennyu, murereennyu; kaname muguleldanyu eng' keeret agenge ne po konyekyuk, eng' koito agenge ne po magatoguk. 10Korooron ne tya chamyeng'ung', chepkamennyu, murereennyu! Karaaran chamyeng'ung' kosiir divaik, ak ng'uunetap mwaisyeguk kosiir tuguuk tugul che ng'uu ne anyiny! 11Rewei kumyat kuting'ung', murereennyu; mi kumyat ak cheego eng' ng'wonyutap ng'elyeptang'ung', ak ng'uunetap ngoroiguk ko uu ng'uunetap Lebanon.
12Mbareet ne kerotin ko chepkamennyu, murereennyu, kong'eet ne kerotin, kondo ne king'ooch. 13Mooriiguk ko mbareetap logoek kobooto logoek che korooron miising', hena kobooto nardo, 14nardo ak safroni, kalamus ak kinamon, kobooto keet age tugul ne po tuguuk che nyamdut, mwanik ak ahalim, kobooto tuguuk tugul che ng'uu ne anyiny che korooron miising'. a a v14 Kalamus ko sosweet ne ng'uu ne anyiny ne kiboisyen koek kiy ne nyamdut. 15Ii kondap mbareet, keriinget ne po peek che sobeen, ak kereruusyek che choorugei kobunu Lebanon. 16Ng'eet, inyee usoonet ne punu kaataam, ak inyoo, usoonet ne punu murot! Iuten mbareennyu, si korootu tuguukyik che ng'uu ne anyiny. Ingonyo chamanennyu mbareennyi ak koam logoekyik che korooron miising'.