Nkhabe Cilema Mwa Iwe
Mamuna asasimba nkazi cinthu na cinthu, asamcemera nkazi wace wa ukwati na mpfumakazi wace, asalonga kuti mwa iye nkhabe kuphonya. Iye ndi munda wakufungwa, tsime yakutsekwa, yace yekha. Kumalisa kwace nkazi asatawira, mbacemera mphepo mbafungula iye ene munda unoyo.
4 1Ndiwe wakubalika kakamwe, wakufunika wanga, ndiwe wakubalika kakamwe! Maso ako ndi njiwa nseri mwa cakufunikira cako. Tsisi zako ndi ninga khola ya mbudzi zinatcitika pa mitsetsenya ya Giliyadi. 2Mano ako ndi ninga mabira adametwa ubweya adakwira mbabuluka m'madzi akusamba, m'bodzi na m'bodzi ali na mapasa, nkhabe m'bodzi wa iwo adaluza mwana wace. 3Milomo yako ndi ninga ntambo wakufuira, na pakamwa pako ndi pakubalika. Masaya ako ndi ninga magawo a romã nseri mwa cakufunikira cako. 4Nsingo wako ndi ninga nsonga ya Dhavidhi, yakumangwa na mizere ya miyala; pa iyo pakamanikwa mapale cikwi cibodzi, onsene ndi mapale a anyankhondo. 5Mabele ako mawiri ndi ninga ana awiri a nyama, mapasa a mphala, anadya pakati pa maluwa. 6Mpaka ntsiku ingatoma kucena na mithundzi mbithawa, Ine ndinaenda ku phiri ya mira na ku ntsonga ya ubani. 7Ndiwe wakubalika mu pyonsene, wakufunika wanga; nkhabe cilema mwa iwe.
8Bwera na ine kubuluka ku Libano, mankhadzi wanga; bwera na ine kubuluka ku Libano. Yang'ana pantsi kubuluka pa nsonga ya Amana, kubuluka pa nsonga ya Seniri na Herimoni, kubuluka m'mphako za nkhalamu, kubuluka m'mapiri akukhala a ingwe. 9Wakwata ntima wanga, mulongo wanga, mankhadzi wanga; wakwata ntima wanga na kuyang'ana kubodzi kwa maso ako, na ulungu ubodzi wa mkanda wako wa pankhosi. 10Kufuna kwako ndi kwakubalika kakamwe, mulongo wanga, mankhadzi wanga! Kufuna kwako ndi kwadidi kupita vinyu, na kununkhira kwa mafuta ako kupita zakununkhira zonsene! 11Milomo yako inatonya uci, mankhadzi wanga; uci na mkaka ali pantsi pa lirimi yako, na kununkhira kwa nguwo zako ndi ninga kununkhira kwa Libano.
12Munda wakufungwa ndi mulongo wanga, mankhadzi wanga, ncera wakufungwa, kasupe wakudindwa. 13Nthambi zako ndi munda wa miti ya romã na misapo yadidi kakamwe, hena pabodzi na narido, 14narido na safroni, kalamu na kanelo, na miti yonsene ya ubani, mira na alowe, na zakununkhira zonsene zadidi kakamwe. a a v14 Kalamu ndi nsasa wakununkhira wakutowera unaphatisirwa basa ninga cakununkhira. 15Iwe ndiwe kasupe wa m'munda, ncera wa madzi amaso, na mikulo inakhuluka kubuluka ku Libano. 16Lamuka, mphepo ya kumpoto, na bwera, mphepo ya kumwera! Putira pa munda wanga, toera zakununkhira zace zibuluke. Wakufunika wanga mbabwere m'munda mwace mbadye misapo yace yadidi kakamwe.
