Ndafungula, mbwenye iye akhadaenda kale
Iye asalonga kuti apita mu munda wace. Buluka nkazi asafotokoza usiku ubodzi adazengereza pa msuwo mbafungula mwakucedwa, mbagumana iye aenda kale. Pakusaka, alindiri ammenya. Pakubvundzwa kuti ninji pidamsiyanisa iye na anango, nkazi asamfotokoza kutomera kumsolo mpaka ku myendo.
5 1Ndapita m'munda mwanga, mulongo wanga, mankhadzi wanga; ndaunganya mura wanga na zakununcira zanga, ndadya nyiici yanga na uci wanga, ndamwa vinyu yanga na nkaka wanga. Idyani, axamwali; mwani, mwani mwakukwana, imwe anyakufunana!
2Ine ndagona, mbwenye ntima wanga ukhali maso. Fala—wakufunika wanga ali kugodomesa: “Ndifungulire, mulongo wanga, nyakufuna wanga, njiwa yanga, wakukwana wanga, thangwi nsolo wanga wanyoroba na mame, tsitsi yanga na madontho a masiku.” 3Ndikhadabvula nguwo yanga—ndingakwanisa tani kuibvala pontho? Ndikhadasambisa miyendo yanga—ndingakwanisa tani kuipswipisa? 4Wakufunika wanga aikha nkono wace pa cifungiro ca msuwo, na ntima wanga watekenyeka nkati mwanga. 5Ndalamuka toera kufungulira wakufunika wanga msuwo, na manja anga akhadontha mura, minwe yanga na mura wakufenda, pa pakuphata pa cifungiro. 6Ndafungulira wakufunika wanga msuwo, mbwenye wakufunika wanga akhadazungunuka mbaenda kale. Moyo wanga wafewa pidalonga iye. Ndansaka, mbwenye nee ndagumana iye tayu; ndancemera, mbwenye iye nee atawira tayu. 7Alindi andigumana mukhayendayenda iwo n'nzinda; andimenya, andipweteka; andibulusa nguwo yanga, iwo alindi a makhoma. 8Ndisakulumbirisani, imwe anankazi a Yerusalemi, mungagumana wakufunika wanga, mum'pange kuti ndaduwala na kufuna. 9Wakufunika wako apiringana tani akufunika anango, iwe wakubalika kakamwe pakati pa akazi? Wakufunika wako apiringana tani akufunika anango, toera utilumbirise tenepa?
10Wakufunika wanga ndi wakuyetimika na wakufwira, wakudzindikirika pakati pa anthu 10.000. 11Nsolo wace ndi ouro wakucena; tsitsi yace ndi yakupombonyeka, yakuda ninga goweya. 12Maso ace ninga njiwa pa mikulo ya madzi, zakusambiswa mu nkaka, zakuikhwa ninga miyala yakufunika pa mbuto yace. 13Masaya ace ninga minda ya zakununcira, minkhonde ya miriri yakununcira. Milomo yace ndi maluwa, yakudontha mura wakufenda. 14Mikono yace ndi ndodo za ouro, zakusasanywa na miyala yakufunika. Manungo ace ndi dzino ya ndzou yakupukutwa, yakubvekeswa na safira. 15Miyendo yace ndi mizati ya alabastro, yakuikhwa pa maziko a ouro wakucena. Maonekero ace ninga Libanu, wakusankhulika ninga mitengo ya sedri. 16Mkanwa mwace ndi kutapira kwene, pontho iye ndi wakusiririka kwene-kwene. Uyu ndi wakufunika wanga, pontho uyu ndi xamwali wanga, imwe anankazi a Yerusalemi.
