Orin Solomoni 5

5 ¹Mo ti wá sínú ọgbà mi, arábìnrin mi, ìyàwó mi; mo ti kó òjìá mi pẹ̀lú tùràrí mi jọ, mo ti jẹ afárá oyin mi pẹ̀lú oyin mi, mo ti mu wáìnì mi pẹ̀lú wàrà mi. Ẹ jẹun, ẹ̀yin ọ̀rẹ́; ẹ mu, ẹ sì mu ún lọ́pọ̀lọpọ̀, ẹ̀yin olólùfẹ́!

²Mo sùn, ṣùgbọ́n ọkàn mi jí. Ìró kan—olólùfẹ́ mi ń kan ìlẹ̀kùn: “Ṣí ilẹ̀kùn fún mi, arábìnrin mi, olùfẹ́ mi, àdàbà mi, ẹni pípé mi, nítorí orí mi kún fún ìrì, irun mi fún ẹ̀kán òru.” ³Mo ti bọ́ ẹ̀wù mi sílẹ̀—báwo ni mo ṣe lè tún wọ̀ ọ́? Mo ti wẹ ẹsẹ̀ mi—báwo ni mo ṣe lè tún sọ wọ́n di ẹlẹ́gbin? ⁴Olólùfẹ́ mi fi ọwọ́ rẹ̀ lé ihò ìlẹ̀kùn, ọkàn mi sì ru sókè nínú mi. ⁵Mo dìde láti ṣí ilẹ̀kùn fún olólùfẹ́ mi, ọwọ́ mi sì ń kán òjìá sílẹ̀, ìka mi ń kán òjìá olómi sílẹ̀, sórí ìdìmú ọ̀pá ìlẹ̀kùn. ⁶Mo ṣí ilẹ̀kùn fún olólùfẹ́ mi, ṣùgbọ́n olólùfẹ́ mi ti yípadà, ó sì ti lọ. Ọkàn mi rọ nígbà tí ó sọ̀rọ̀. Mo wá a, ṣùgbọ́n n kò rí i; mo pè é, ṣùgbọ́n kò dáhùn. ⁷Àwọn olùṣọ́ rí mi bí wọ́n ti ń rìn kiri ìlú; wọ́n lù mí, wọ́n ṣá mi lọ́gbẹ́; wọ́n gba aṣọ ìbora mi lọ́wọ́ mi, àwọn olùṣọ́ odi náà. ⁸Mo fi yín bú, ẹ̀yin ọmọbìnrin Jerúsálẹ́mù, bí ẹ bá rí olólùfẹ́ mi, ẹ sọ fún un pé àìsàn ìfẹ́ ń ṣe mí. ⁹Kí ni olólùfẹ́ rẹ ju olólùfẹ́ mìíràn lọ, ìwọ arẹwà jùlọ nínú àwọn obìnrin? Kí ni olólùfẹ́ rẹ ju olólùfẹ́ mìíràn lọ, tí o fi ń fi wá bú báyìí?

¹⁰Olólùfẹ́ mi dán mọ́rán, ó sì pọ́n roro, ó ta yọ láàrín ẹgbàárùn-ún. ¹¹Orí rẹ̀ jẹ́ wúrà tí ó dára jù; irun rẹ̀ ṣùṣù, ó sì dúdú bí ẹyẹ ìwò. ¹²Ojú rẹ̀ dàbí àdàbà ní ẹ̀bá ìṣàn omi, tí a fi wàrà wẹ̀, tí a tò bí òkúta iyebíye sí ipò wọn. ¹³Ẹ̀rẹ̀kẹ́ rẹ̀ dàbí ebè tùràrí, ilé gogoro ewéko olóòórùn dídùn. Ètè rẹ̀ jẹ́ òdòdó lílì, tí ń kán òjìá olómi sílẹ̀. ¹⁴Apá rẹ̀ jẹ́ ọ̀pá wúrà, tí a fi òkúta iyebíye tò. Ara rẹ̀ jẹ́ eyín erin dídán, tí a fi òkúta safáyà ṣe lọ́ṣọ̀ọ́. ¹⁵Ẹsẹ̀ rẹ̀ jẹ́ ọ̀wọ̀n alabasítà, tí a gbé ka ìpìlẹ̀ wúrà dáradára. Ìrísí rẹ̀ dàbí Lẹbánónì, ó jẹ́ àyànfẹ́ bí igi kédárì. ¹⁶Ẹnu rẹ̀ dùn pátápátá, ó sì jẹ́ ẹni tí ó wu ni ní gbogbo ọ̀nà. Èyí ni olólùfẹ́ mi, èyí sì ni ọ̀rẹ́ mi, ẹ̀yin ọmọbìnrin Jerúsálẹ́mù.