雅歌 4

4 ¹我嘅愛人, 你幾咁靚啊,你真係好靚! 你嘅眼喺面紗後面好似鴿子咁。 你嘅頭髮好似一群山羊, 順住基列山坡流落嚟。 ²你嘅牙齒好似一群啱啱剪完毛嘅母羊,由洗濯之處上嚟, 隻隻都成雙成對,冇一隻孤單無伴。 ³你嘅嘴唇好似一條硃紅色嘅線,你把口好可愛。 你嘅面頰喺面紗後面,好似半個石榴咁。 ⁴你嘅頸好似大衛嘅樓, 一層層石砌成;上面掛住一千面盾牌, 面面都係勇士嘅盾牌。 ⁵你兩個乳房好似兩隻小鹿, 好似羚羊嘅雙胞胎,喺百合花之間食草。 ⁶等到天光起風、影兒消散嘅時候, 我要去沒藥山, 去乳香嶺。 ⁷我嘅愛人,你全身都咁靚;你毫無瑕疵。

⁸我嘅新娘,同我一齊由黎巴嫩嚟啦; 同我一齊由黎巴嫩嚟啦。 由亞瑪拿山頂望落嚟, 由示尼珥同黑門山頂望落嚟, 由獅子嘅洞穴, 由豹子出沒嘅山嶺望落嚟。 ⁹我嘅妹妹, 我嘅新娘, 你奪咗我個心;你用眼睛望我一眼, 用你頸鏈嘅一粒寶石,就奪咗我個心。 ¹⁰我嘅妹妹,我嘅新娘, 你嘅愛情幾咁美好! 你嘅愛情比酒更美, 你香膏嘅芬芳勝過一切香料! ¹¹我嘅新娘,你嘅嘴唇滴落蜜糖; 你舌頭底下有蜜同奶, 你衣裳嘅香氣 好似黎巴嫩嘅香氣。

¹²我嘅妹妹, 我嘅新娘,係一個鎖住嘅園,一個關閉嘅泉源,一個封住嘅水井。 ¹³你嘅枝子係一個石榴園, 結住最上好嘅果子,有鳳仙花同哪噠香膏, ¹⁴有哪噠同番紅花、菖蒲同肉桂, 同各樣乳香樹、 沒藥、沉香, 同一切最上好嘅香料。 ^a a v14 菖蒲係一種有香味嘅蘆葦,用嚟做香料。 ¹⁵你係園中嘅泉源,係活水嘅井, 係由黎巴嫩流落嚟嘅溪水。 ¹⁶北風啊,醒起身啦; 南風啊,吹過嚟啦! 吹過我個園, 等佢啲香料 散發出嚟。願我嘅愛人入嚟佢個園, 食佢最上好嘅果子。