Gũtirĩ Kĩmeni Harĩ Wee
Mũndũ mũrũme agooca mũtumia kĩndũ o kĩndũ kĩa mwĩrĩ wake, akamwĩta mũhiki wake na mwarĩ wa maitũ, akoiga atĩ ndarĩ na kĩrema. Nĩ mũgũnda mũhingĩre, itherũkĩro rĩhingĩre na mũhũũri, na nĩ wake we wiki. Marigĩrĩrioinĩ nake agacookia, agakaĩra rũhuho na akahingũra mũgũnda ũcio we mwene.
4 1Kaĩ ũrĩ mũthaka-ĩ, mwendwa wakwa, kaĩ ũrĩ mũthaka! Maitho maku nĩ ta ndutura irĩ thuutha wa gĩtambaya gĩaku. Njuĩrĩ yaku ĩhaana ta rũũru rwa mbũri rũgĩikũrũka kuuma irĩmainĩ cia Gileadi. 2Magego maku mahaana ta rũũru rwa ng'ondu cienjetwo o rĩu ikĩambata kuuma gũthaambio, o ĩmwe yacio ĩrĩ na mahatha, na gũtirĩ o ĩmwe thĩinĩ wacio ĩteheirwo kĩana kĩayo. 3Mĩromo yaku ĩhaana ta rũrigi rũtune, na kanua gaku nĩ ka gũkenia. Makai maku mahaana ta icunjĩ igĩrĩ cia itunda rĩa mũkomamanga, irĩ thuutha wa gĩtambaya gĩaku. 4Ngingo yaku ĩhaana ta mũthiringo mũraihu wa Daudi, ũrĩa wakĩtwo na mahiga maigĩrĩre mĩhari; igũrũ rĩaguo gũcuurie ngo ngiri ĩmwe, o ĩmwe ĩrĩ ngo ya njamba ya ita. 5Nyondo ciaku cierĩ ihaana ta njaũ igĩrĩ, mahatha ma thwariga, ikĩrĩithagio gatagatĩ ka mahũa. 6Nginya rĩrĩa mũthenya ũkũhũhũka, nacio ciĩruru ciũre, nĩngathiĩ kĩrĩmainĩ kĩa manemane, o na karĩmainĩ ka ũbani. 7Ũrĩ mũthaka biũ, mwendwa wakwa; gũtirĩ kĩmeni harĩwe.
8Ũka tũthiĩ nawe kuuma Lebanoni, mũhiki wakwa; ũka tũthiĩ nawe kuuma Lebanoni. Ũrorere thĩ ũrĩ gacũmbĩrĩ ka Amana, kuuma gacũmbĩrĩ ka Seniri na Herimoni, kuuma ngurungainĩ cia mĩrũũthĩ, kuuma irĩmainĩ kũrĩa ngarĩ itũũraga. 9Nĩũtahĩte ngoro yakwa, mwarĩ wa maitũ, mũhiki wakwa; nĩũtahĩte ngoro yakwa na kũrora kũmwe kwa maitho maku, na ihiga rĩmwe rĩa mũgathĩ waku. 10Kaĩ wendo waku ũrĩ mũthaka-ĩ, mwarĩ wa maitũ, mũhiki wakwa! Kaĩ wendo waku ũkĩrĩte ndibei mũno-ĩ, naguo mũnungo wa maguta maku ũkĩrĩte mahuti mothe marĩ mũnungo mwega! 11Mĩromo yaku ĩtaataga ũũkĩ, mũhiki wakwa; ũũkĩ na iria irĩ rungu rwa rũrĩmĩ rwaku, naguo mũnungo wa nguo ciaku ũhaana ta mũnungo wa Lebanoni.
12Mwarĩ wa maitũ, mũhiki wakwa, nĩ mũgũnda mũhingĩre, gĩthima kĩhingĩre, itherũkĩro rĩhingĩre na mũhũũri. 13Honge ciaku nĩ mũgũnda wa mĩkomamanga ũrĩ na matunda marĩa mega mũno, mĩtĩ ya hina hamwe na naridi, 14naridi na safarani, ithanjĩ rĩa mũnungo na mũdalathini, hamwe na mĩtĩ yothe ya ũbani, manemane na mĩaloe, hamwe na mahuti mothe marĩa mega mũno marĩ mũnungo. a a v14 Ithanjĩ rĩa mũnungo nĩ ithanjĩ rĩrĩ na mũnungo mwega rĩrĩa rĩhũthagĩrwo ta kĩndũ gĩa kũnungithia irio. 15Wee ũrĩ itherũkĩro rĩa mũgũnda, gĩthima kĩa maaĩ marĩ muoyo, na tũrũũĩ tũgũikũrũka kuuma Lebanoni. 16Arahũka, wee rũhuho rwa gathigathini, na wee rũhuho rwa gũthini, ũũke! Hũhĩra mũgũnda wakwa, nĩguo mahuti maguo marĩ mũnungo matherere. Mwendwa wakwa nĩooke mũgũndainĩ wake, arĩe matunda maguo marĩa mega mũno.