Mũthenya wa Kĩhikanio kĩa Mũthamaki

Mũtumia acaragia ũrĩa endete itũũra inene rĩrĩ nduma, akoria arangĩri, agacooka akamuona, nake akarega kũmũrekia athiĩ nginya amũtware nyũmba ya nyina. Mĩgambo ĩngĩ ĩgacooka ĩkarora ngaari ya Solomoni ĩrĩa ĩrangĩirwo ĩgĩũka, mũthamaki ehumbĩte thũmbĩ mũthenya wa kĩhikanio gĩake.

Gĩcunjĩ 3.

Ũtukũ wothe ndĩ ũrĩrĩinĩ wakwa, ngĩcaria ũrĩa ngoro yakwa yendete; ndaamũcaririe, no ndiamuonire. Rĩu nĩngũũkĩra, njũrũũre itũũra rĩrĩa inene, njĩrainĩ na ihaaroinĩ; ngaacaria ũrĩa ngoro yakwa yendete. Ndaamũcaririe, no ndiamuonire. Arangĩri nĩmaanyonire rĩrĩa maathiũrũrũkagĩria itũũra rĩrĩa inene. “Nĩmuonete ũrĩa ngoro yakwa yendete?” Ndaarĩkia o kũmahĩtũka, ngĩona ũrĩa ngoro yakwa yendete. Ngĩmũnyiita, ngĩrega kũmũrekia athiĩ, nginya rĩrĩa ndaamũtwarire nyũmba ya maitũ, kanyũmbainĩ ka ũrĩa wanjiarire. Nĩngũmũringĩrĩria, inyuĩ aarĩ a Jerusalemu, na thwariga na thiya cia werũinĩ: mũtikaarahũre kana mũũkĩrie wendo o nginya rĩrĩa gũgaakenda.

Nũũ ũyũ ũrooka ambataga oimĩte werũinĩ ahaana ta itugĩ cia ndogo, mũnungĩte wega nĩ manemane na ũbaani, na mũhũũ wothe mũnungi mwega wa mwonjoria? Ta rora—nĩ ngaari ya gũkuuo ya Solomoni mwene, ĩthiũrũrũkĩirio nĩ njamba mĩrongo ĩtandatũ, cia njamba cia ita cia Isiraeli, othe manyiitĩte hiũ cia njora, mamenyeretio mbaara, o ũmwe arĩ na rũhiũ rwake rwa njora mbarũinĩ ciake, nĩ ũndũ wa guoya wa ũtukũ. Mũthamaki Solomoni nĩeyathondekeire ngaari ya gũkuuo na mbaũ cia kuuma Lebanoni. Itugĩ ciayo aacithondekire na betha, mũgongo wayo na thahabu, gĩtĩ kĩayo na rangi wa ndathi; thĩinĩ wayo nĩgwagemetio na wendo nĩ aarĩ a Jerusalemu. Umĩrai nja, inyuĩ aarĩ a Zayuni, mũrore Mũthamaki Solomoni, ehumbĩte thũmbĩ ĩrĩa nyina aamwĩkĩrire mũthenya wa kĩhikanio gĩake, mũthenya ũrĩa ngoro yake yakenire.