Awungawui Shakazā Zimiksho
Sha̱nao china ana leikashe chili ngayā keinungli phāzata, khamayonabingli hoi, chiwui thili ali samphanglaga ava̱wui shimli vaikhuirang eina tangda machihomana. Chiwui thili khangatei akhonbingna kapangabingna ngāk kahai Solomonwui dolai rākhayang chi yanga; awunga chi awui ngalā shakzāthangli kuihon ngahona.
3 1Iwui petli ngayā hupta imanglāna leishi kaje ina phai; ali phai, kha ali masamphangmana. 2Ara ina ngakarthuida chānreili kala leihngapha̱li keinung yongshang yongtāda, imanglāna leishi kaje ina phāra. Ali phai, kha ali masamphangmana. 3Shantribingna keinung kuimareida tharan ili samphanga. "Imanglāna leishi kaje nathumna theihairala?" 4Ina athumli saklak eina kāhai tharan imanglāna leishi kaje samphanga. Ishava̱wui shimli, ili vaikhui kaje wui kāli ali khuizangranglakha eina tangda ali singtitta machihomana. 5O Jerusalemwui naongalāva̱bing, ina nathumli kahāngna, ramwui chaonaowui kala seichui mingsinda: leikashi makharākalu, ningyāng maungranglakha, khamathotla mamathotalu.
6Lamhāng eina rākasā, meikhut machut thāda, myrrh kala frankincense eina heirorda, leikasāwui nganamkaphā ayur khamataiya eina heirorkasā hi khipākhala? 7Yanglu, chi Solomon khalattawui gari! Israelwui kapingabingwui eina kapinga hangtharukna chi kuimareida lei, 8athum saikorana raighai singda, raili tamchithei kahai, kachichāwui raighai awui akaili, ngayāwui khangachee chiwui vang leiya. 9Awunga Solomonna khalattawui vang Lebanonwui thing eina gari akha sākhui. 10Ana chiwui pākra̱ lupāsā eina, chiwui azing sinā eina, chiwui pam hungrisi eina sākhui; chiwui alung Jerusalemwui naongalāva̱bingna leikashi eina chonnarsera. 11O Zionwui naongalāva̱bing, shoklu, kala awui shakazā zimiksholi, awui ning mathāna zimiksho chili, ava̱va̱na ali sangmi kahai kuihon ngahonda khalei Awunga Solomonli ngashānlu.
