Solomonwui Laa 2

2 ¹I hi Sharonwui awona, tampākbingwui timrāwona. ²Lenghuibing ngachaili timrāwon thāda, iwui leikashiva̱ ngalānaobing ngachaili chithāda leiya. ³Ngahongwui thingrongbing ngachaili theithuktheirong thāda, iwui leikashia yaronnaobing ngachaili chithāda leiya. Khamathān kahai eina ina awui khaya̱li pama, kala awui athei imazapkhayangli shima. ⁴Ana ili zātkhāng shimli khuirai, kala awui philān iwuitungli leikashina. ⁵Drakhāthei eina ili yangmilu, theithukthei eina ili ringphā ngasakmilu, kaja I leishināhaira. ⁶Awui uipang ikuizingli lei, kala awui yāpāngna ili vamsi. ⁷O Jerusalemwui naongalāva̱bing, ina nathumli kahāngna, ramwui chaonaowui kala seichui mingsinda: leikashi makharākalu, ningyāng maungranglakha, khamathotla mamathotalu.

⁸Iwui leikashiwui akhonna! Ana rā, kaphungbing tungli ngalongkāda, phungrābing tungli chakta. ⁹Iwui leikashia seichui, chaovānao kathāna. Yanglu, ana iniwui phākho khanukli nganinga, charfa eina yangtitta, charfanao eina yangshoka. ¹⁰Iwui leikashina ili hānga: Ngakarthuilu, iwui leikashiva̱, iwui khamathāva̱, kala thuihaolu, ¹¹kaja sikachāng kānthuihaira; zingrot kupta latunghaira. ¹²Awonbing okathuili shokhaira, laasakwui atam rauwa, kala nāsha̱wui akhon iniwui ngaleili nganāhaira. ¹³Khaorārongna awui khaorāthei mingasaka, kala drakhārong awon wonhaira; athumwui anganam kha̱shoka. Ngakarthuilu, iwui leikashiva̱, iwui khamathāva̱, kala thuihaolu. ¹⁴Iwui nāsha̱, lunghārwui amaitarenli, lungkaiwui ngayinpamli, namai ili theingasaklu, nakhon ili shāngasaklu, kaja nakhon shima, kala namai leishirihai. ¹⁵Drakhā yāmgui sāshimāna ramfanaobing, ramfabing chi ithumwui vang tukkhuilu, kaja iniwui drakhā yāmguili awon wonhaira. ¹⁶Iwui leikashia iwuina, kala I awuina; a timrāwon pamli hompama. ¹⁷Kazing mayingranglakha, khaya̱ makānthuiranglakha, iwui leikashe, ngalanlu, kala kaphung kajuibingtungli seichui thāda, chaovānao thāda sālu.