雅歌 2

2 ¹我係沙崙嘅玫瑰花, 係谷中嘅百合花。 ²百合花喺荊棘之中點樣,我嘅愛人喺眾少女之中都係咁樣。 ³蘋果樹喺樹林嘅眾樹之中點樣, 我嘅愛人喺眾少年之中都係咁樣。 我好開心咁坐喺佢嘅樹蔭下面, 佢嘅果子喺我口中甜到不得了。 ⁴佢帶我入到筵席廳,佢喺我頭上高舉嘅旗係愛。 ⁵用提子乾扶持我, 用蘋果使我精神返, 因為我為愛情病咗。 ⁶佢嘅左手枕住我個頭, 佢嘅右手攬住我。 ⁷耶路撒冷嘅眾女子啊,我指住田野嘅羚羊同母鹿囑咐你哋: 唔好挑動、唔好喚醒愛情, 直到佢自己願意嗰陣。

⁸我愛人嘅聲音!佢嚟緊喇, 喺山上跳過嚟, 喺嶺上蹦過嚟。 ⁹我嘅愛人好似一隻羚羊,又好似一隻小鹿。 你睇,佢企喺我哋道牆後面, 喺窗仔向入面望, 喺窗櫺向入面睇。 ¹⁰我嘅愛人對我講:起身喇,我嘅愛人,我嘅美人,同我一齊走喇, ¹¹因為冬天已經過去, 雨水都停晒、走晒喇。 ¹²百花喺地上開晒,唱歌嘅時候 到喇, 喺我哋嘅 地方聽到斑鳩嘅聲音。 ¹³無花果樹嘅果子熟緊喇, 葡萄樹開花放香。 起身喇,我嘅愛人,我嘅美人,同我一齊走喇。 ¹⁴我嘅白鴿啊,你喺磐石嘅罅隙裏面, 喺懸崖嘅隱密處, 俾我睇下你嘅面, 俾我聽下你嘅聲, 因為你嘅聲甜美, 你嘅面可愛。 ¹⁵同我哋捉狐狸啦, 就係嗰啲糟蹋葡萄園嘅小狐狸, 因為我哋嘅葡萄園正開緊花。 ¹⁶我嘅愛人係我嘅, 我又係佢嘅;佢喺百合花之中放牧。 ¹⁷等到天光透風、影子消退嗰陣, 我嘅愛人啊,你轉身返嚟, 好似一隻羚羊, 又好似一隻喺崎嶇山嶺上嘅小鹿咁。