Lamuka, Wakufunika Wanga, Mbubwera
Nkazi asalonga, mbakumbuka mthunzi wace, nyumba ya phwando, mkono wace pantsi pa nsolo wace. Buluka penepo asabwerezera kucemera kwace kubulukira pa windo: nthawe ya mphepo yamala, nkuyu zisapsa, bwera tiende. Kawiri iye asacenjeza ana akazi a Yerusalemu kuti aleke kulamusa ufuni mbudzati kufika nthawe yace.
2 1Ine ndine luwa ya Xaroni, luwa ya m'midambo. 2Ninga luwa pakati pa minga, ndimo ulili wakufunika wanga pakati pa atsikana. 3Ninga muti wa maapulo pakati pa miti ya nsitu, ndimo ulili wakufunika wanga pakati pa aphale. Ndakhala pansi pa nthundzi wace mwakutsandzaya kukulu, misapo yace ikhali yakutapira pakulawa kwanga. 4Iye andipereka ku nyumba ya phwando, mbendera yace padzulu panga ikhali kufuna. 5Ndiwangiseni na mauva akuuma, ndicitiseni mphambvu na maapulo, thangwi ndaduwala na kufuna. 6Nkhono wace wa bzwere uli pansi pa nsolo wanga, nkhono wace wa madyo usandikhumbatira. 7Ndisakudandaulirani, anamwali a Yerusalemi, na mphunga peno na ntsefu za nthando: lekani kumusa peno kulamusa kufuna mpaka n'dzidzi wace unakwana.
8Fala ya wakufunika wanga! Iye ali kubwera, mbakulumpha pa mapiri, mbakuthambaruka pa mingolo. 9Wakufunika wanga ali ninga mphunga peno nsengwe wang'ono. Onani, iye ali pakhundu pa khoma yathu, mbayang'ana nkati mu majanela, mbaonesesa nkati mu mipata. 10Wakufunika wanga asandipanga tenepa: Lamuka, wakufunika wanga, wakubalika wanga, mbubwera, 11thangwi n'dzidzi wa mphepo wapita; mvura yamala mbiyenda. 12Maluwa asaoneka pa dziko, n'dzidzi wakuimba wakwana, fala ya njiwa isabveka m'dziko mwathu. 13Muti wa nkuyu usapsesa nkuyu zace, mitcheka ya mauva iri na maluwa; isapereka cakununkhira cace. Lamuka, wakufunika wanga, wakubalika wanga, mbubwera. 14Njiwa yanga, m'mipata ya mwala, m'mbuto zakubisala za phiri, ndione nkhope yako, ndibve fala yako, thangwi fala yako ndi yakutapira, nkhope yako ndi yakubalika. 15Phatani nkhandwe thangwi ya ife, nkhandwe zing'ono zinafudza minda ya mauva, thangwi minda yathu ya mauva iri na maluwa. 16Wakufunika wanga ndi wanga, Ine ndine wace; iye asadya pakati pa maluwa. 17Mpaka ntsiku unapuma na mithundzi inathawa, zungunuka, wakufunika wanga, khala ninga mphunga peno nsengwe wang'ono pa mapiri a miyala.
