Wimbo Ulio Bora 2

2 ¹Mimi ni waridi wa Sharoni, nyinyoro wa mabondeni. ²Kama nyinyoro katikati ya miiba, ndivyo alivyo mpenzi wangu katikati ya wasichana. ³Kama mtofaa katikati ya miti ya msituni, ndivyo alivyo mpendwa wangu katikati ya vijana. Kwa furaha kuu niliketi kivulini mwake, na tunda lake lilikuwa tamu kinywani mwangu. ⁴Alinileta katika ukumbi wa karamu, na bendera yake juu yangu ilikuwa upendo. ⁵Nitegemezeni kwa zabibu kavu, niburudisheni kwa tofaa, kwa maana ninaugua kwa mapenzi. ⁶Mkono wake wa kushoto uko chini ya kichwa changu, na mkono wake wa kuume unanikumbatia. ⁷Nawaapisha, enyi binti za Yerusalemu, kwa paa na kwa ayali wa porini: msiyachochee wala kuyaamsha mapenzi hata yatakapopenda yenyewe.

⁸Sauti ya mpendwa wangu! Anakuja akirukaruka juu ya milima, akiruka juu ya vilima. ⁹Mpendwa wangu ni kama paa au ayali kijana. Tazama, amesimama nyuma ya ukuta wetu, akichungulia madirishani, akitazama kupitia vimiani. ¹⁰Mpendwa wangu ananiambia: Ondoka, mpenzi wangu, mrembo wangu, na twende zetu, ¹¹kwa maana wakati wa baridi umepita; mvua imekwisha na kutoweka. ¹²Maua yanachipuka juu ya nchi, wakati wa kuimba umewadia, na sauti ya hua imesikika katika nchi yetu. ¹³Mtini unaivisha tini zake, na mizabibu inatoa maua; vinatoa harufu yake nzuri. Ondoka, mpenzi wangu, mrembo wangu, na twende zetu. ¹⁴Njiwa wangu, uliye katika mianya ya mwamba, katika maficho ya jabali, niache nikuone uso wako, niache niisikie sauti yako, kwa maana sauti yako ni tamu, na uso wako ni mzuri. ¹⁵Tukamatieni mbweha, wale mbweha wadogo waharibuo mashamba ya mizabibu, kwa maana mashamba yetu ya mizabibu yanatoa maua. ¹⁶Mpendwa wangu ni wangu, nami ni wake; anachunga katikati ya nyinyoro. ¹⁷Hata mchana utakapopumua na vivuli vitakapokimbia, geuka, mpendwa wangu, uwe kama paa au ayali kijana juu ya milima yenye majabali.