ISihlabelelo Sezihlabelelo 2

2 ¹Ngiyimbali yaseSharoni, umnduze wezigodi. ²Njengomnduze phakathi kwameva, sinjalo isithandwa sami phakathi kwezintombi. ³Njengesihlahla se-apula phakathi kwezihlahla zehlathi, sinjalo isithandwa sami phakathi kwezinsizwa. Ngenjabulo enkulu ngahlala emthunzini waso, nezithelo zaso zazimnandi ekunambitheni kwami. ⁴Wangingenisa endlini yedili, nebhanela lakhe phezu kwami laluluthando. ⁵Ngisekele ngamagilebhisi omisiwe, ungiqabule ngama-apula, ngokuba ngiyagula luthando. ⁶Isandla sakhe sobunxele singaphansi kwekhanda lami, nesandla sakhe sokunene siyangigona. ⁷Ngiyaniyala, madodakazi aseJerusalema, ngezinsephe noma ngezimpala zasendle: ningaluvusi noma niluphaphamise uthando luze luthande lona.

⁸Izwi lesithandwa sami! Siyeza seqa phezu kwezintaba, siqhasha phezu kwamagquma. ⁹Isithandwa sami sinjengensephe noma ithole lenyamazane. Bheka, simi lapho ngemuva kodonga lwethu, sibuka ngamafasitela, silunguza ngeminxantela. ¹⁰Isithandwa sami sithi kimi: Vuka, sithandwa sami, muhle wami, uze uhambe nami, ¹¹ngokuba ubusika sebudlule; imvula isiphelile yahamba. ¹²Izimbali zivela emhlabeni, isikhathi sokuhlabelela sesifikile, nezwi lejuba lizwakala ezweni lakithi. ¹³Umkhiwane uvuthisa amakhiwane awo, nemivini iyaqhakaza; ikhipha iphunga layo elimnandi. Vuka, sithandwa sami, muhle wami, uze uhambe nami. ¹⁴Juba lami, elisemifantwini yedwala, ezindaweni ezifihlekile zeliwa, ake ngibubone ubuso bakho, ngilizwe izwi lakho, ngokuba izwi lakho limnandi, nobuso bakho buhle. ¹⁵Sibambeleni izimpungushe, izimpungushana ezonakalisa izivini, ngokuba izivini zethu ziyaqhakaza. ¹⁶Isithandwa sami singesami, nami ngingowaso; sidla phakathi kweminduze. ¹⁷Kuze kuphele usuku nezithunzi zibaleke, phenduka, sithandwa sami, ube njengensephe noma ithole lenyamazane ezintabeni ezimaqele.