Telama, Watondama Wama, amana Wisa
Mukhetu wazimbula, wasungamina tsya kivula kyandi, nzu ya mukinzi, yi koku kwandi ku sina dya mutwa wandi. Buna wavutukila ndinga yandi mu matalatala: kyosi kimani, fiki zisi yela, wisa kwama. Mbala zodi wasyamisa bakhetu ba ku Yelusalemi ni balembwa sikumuna lungongu kedi lwawu lwazola lwawu-meni.
2 1Meni, ndinina kithundu kya Salo, kithundu kya mindimba. 2Bwosu kithundu kyenina hana kati dya miti mya tsaku, bwabuna watondama wama wenina hana kati dya bandumba. 3Bwosu miti wa pomo wenina hana kati dya miti mya musitu, bwabuna watondama wama wenina hana kati dya bangunza. Muna kyesi kya lawu, yázakala hana tsya kivula kyandi, amana bibundu byandi byákala bya pha mu munwa wama. 4Yandi wánata meni ku nzu ya mukinzi, amana dibendela dyandi hana thandu yama dyákala lungongu. 5Lumphana ngolu ni bibundu bya vinu byayuma, lundembika ni mapomo, mukuma yibedi maladi ma lungongu. 6Koku kwandi kwa lumoso kwenina ku sina dya mutwa wama, amana koku kwandi kwa lubakala kukhangidi. 7Yilutumini, benu bakhetu ba ku Yelusalemi, ni zinsesi holo ni zinkayi za mu mfinda: lutukulaku holo lusikimisaku lungongu kedi lwawu lwazóla lwawu-meni.
8Ndinga ya watondama wama! Yandi wisi kwisa, wisi dumuka hana myongu, wisi zawuka hana mina mya khunda. 9Watondama wama wafwanana ni nsesi holo ni mwana wa ngulungu. Tala, yandi watelama ku manima ma kibaka kyetu, watála mu matalatala, watála mu mabulu ma luphangu. 10Watondama wama wunzimbwadi meni: Telama, watondama wama, ngeyi wa kitoku, amana wisa kwama, 11mukuma tangwa dya kyosi diluti; mvula wumanisi amana wahita. 12Bithundu bisi monika ha tsi, tangwa dya singu dyisidi, amana ndinga ya yembi yisi yukalakana mu tsi yetu. 13Mufiki wisi benga bibundu byandi bya fiki, amana vinu disi mena bithundu; byisi hana mvumba ya byawu. Telama, watondama wama, ngeyi wa kitoku, amana wisa kwama. 14Yembi dyama, mu mabulu ma ditadi, mu bitsweki bya mongu, yambula yimona mbunzu yaku, yambula yíyuka ndinga yaku, mukuma ndinga yaku yenina ya pha, amana mbunzu yaku yenina ya kitoku. 15Lukwatenu mikengi, kikuma kya betu, mikengi mya khunda mina misi bivisa bilanga bya vinu, mukuma bilanga byetu bya vinu bisi mena bithundu. 16Watondama wama wenina wama, amana meni ndinina wandi; yandi wisi dya hana kati dya bithundu. 17Kedi tangwa dyavevuluka amana madinde matina, baluka, watondama wama, amana wakala bwosu nsesi holo bwosu mwana wa ngulungu hana myongu mya matadi.
