መሃልየ 2 FHB Father's Heart Bible™

2 ¹ኣነ ናይ ሳሮን ፅገሬዳ፥ ናይ ለሰታት ዕምበባ ሱፍ እየ። ²ከም ዕምበባ ሱፍ ኣብ መንጎ ኣሻዅ ቈጥቋጥ፥ ፍትውተይ ከኣ ኣብ መንጎ ኣዋልድ ከምኡ እያ። ³ከም ኦም ቱፋሕ ኣብ መንጎ ኣእዋም ዱር፥ ፍቑረይ ከኣ ኣብ መንጎ ኣወዳት ከምኡ እዩ። ብዓብዪ ሓጐስ ኣብ ፅላሉ ኮፍ በልኩ፥ ፍረኡ ድማ ንጐረሮይ ጥዑም ነበረ። ⁴ናብ ኣዳራሽ መስተ ኣእተወኒ፥ ሰንደቕ ዕላማኡ ኸዓ ኣብ ልዕለይ ፍቕሪ ነበረ። ⁵ብዘለላ ወይኒ ደግፉኒ፥ ብቱፋሕ ኣርውዩኒ፥ ብፍቕሪ ሓሚመ እየ እሞ። ⁶ፀጋም ኢዱ ኣብ ትሕቲ ርእሰይ ኣላ፥ የማን ኢዱ ኸዓ ይሐቍፈኒ። ⁷ኣትን ኣዋልድ ኢየሩሳሌም፥ በተን ሰስሓታትን ብዋልያታት በረኻን ኣምሕለክን፦ ንፍቕሪ ክሳዕ ባዕላ እትደሊ ኣይተተስእኣን ኣይተበራብርኣን።

⁸ድምፂ ፍቑረይ! እንሆ ኣብ ልዕሊ እምባታት እናዘለለ፥ ኣብ ልዕሊ ኰረብታታት እናነጠረ ይመፅእ ኣሎ። ⁹ፍቑረይ ከም ሰስሓ ወይ ከም ጥቡዕ ዓጋዜን እዩ። እንሆ፥ ኣብ ድሕሪ መንደቕና ደው ኢሉ ኣሎ፥ ብመሳዅቲ እናጠመተ፥ ብዓይኒ ርግቢ እናማዕደወ። ¹⁰ፍቑረይ ከምዙይ ይብለኒ ኣሎ፦ ተስኢ፥ ፍትውተይ፥ መልክዐኛይ፥ ንዒ፥ ¹¹ክረምቲ ሓሊፉ እዩ እሞ፥ ዝናም ድማ ወዲኡ ሓሊፉ እዩ። ¹²ዕምበባታት ኣብ ምድሪ ተገሊፆም፥ ግዜ ደርፊ በፅሐ፥ ድምፂ ባሪቶ ድማ ኣብ ምድርና ይስማዕ ኣሎ። ¹³በለስ ንፍሬኣ ተብስል ኣላ፥ ኣታኽልቲ ወይኒ ድማ ዓምቢቦም፥ መኣዛኦም ይህቡ ኣለዉ። ተስኢ፥ ፍትውተይ፥ መልክዐኛይ፥ ንዒ። ¹⁴ኣቲ ርግበይ፥ ኣብ ንቓዓት ከውሒ፥ ኣብ መሕብኢ ፀድፊ፥ ገፅኪ ኣርእይኒ፥ ድምፅኺ ኣስምዕኒ፥ ድምፅኺ ጥዑም እዩ እሞ፥ ገፅኪ ድማ መልክዐኛ እዩ። ¹⁵ነተን ውኻርያታት፥ ነተን ኣታኽልቲ ወይኒ ዘበላሽዋ ናእሽቱ ውኻርያታት ሓዙልና፥ ኣታኽልቲ ወይንና ዓምቢቦም ኣለዉ እሞ። ¹⁶ፍቑረይ ናተይ እዩ፥ ኣነ ድማ ናቱ እየ፤ ኣብ መንጎ ዕምበባ ሱፍ ይጓሲ ኣሎ። ¹⁷መዓልቲ ክሳዕ እትነፍስ፥ ፅላሎት ክሳዕ ዝሃድም፥ ኣታ ፍቑረይ፥ ተመለስ፥ ከም ሰስሓ ድማ ኩን፥ ወይ ኣብ እምባታት ባተር ከም ጥቡዕ ዓጋዜን።