غزلې 2 FHB Father's Heart Bible™

2 ¹زۀ د شارون ګلاب يم، د وادو سوسن يم. ²لکه څنګه چې ازغو کښې سوسن وى، هم هغه شان زما محبوبه د جينکو په مينځ کښې ده. ³لکه څنګه چې د ځنګل د ونو په مينځ کښې د مڼې ونه وى، هم هغه شان زما محبوب د ځوانانو په مينځ کښې دے. زۀ په ډېرې خوشحالۍ د هغۀ په سيورى کښې کښېناستم، او د هغۀ مېوه زما خوله له خوږه وه. ⁴هغۀ زۀ د مېلمستيا تالار ته راوستم، او زما له پاسه د هغۀ جنډه مينه وه. ⁵ما ته د مُنقو سره طاقت راکړئ، په مڼو سره مې تازه کړئ، ځکه چې زۀ د مينې نه ناروغه يم. ⁶د هغۀ کيڼ لاس زما د سر لاندې دے، او د هغۀ ښى لاس ما غېږ کښې نيسى. ⁷اے د يروشلم لوڼو، زۀ تاسو ته د هوسيو او د ميدان د هوسۍ په قسم وايم چې، مينه مۀ راپاروئ او مۀ راويښوئ ترڅو چې د هغې خوښه نۀ وى.

⁸د زما د محبوب آواز! هغه راځى، په غرونو باندې ټوپونه وهى، په غونډيو باندې ټوپونه وهى. ⁹زما محبوب د هوسۍ يا د ځوان هوسۍ په شان دے. ګوره، هغه هلته زمونږ د ديوال شا ته ولاړ دے، د کړکيو نه ګورى، د جالۍ نه بهر ګورى. ¹⁰زما محبوب ما ته وائى چې، اے زما محبوبې، اے زما ښکُلې، پاڅه او راروانه شه، ¹¹ځکه چې ژمے تېر شو، باران بس شو او لاړو. ¹²په زمکه باندې ګلونه راښکاره شول، د سندرو وخت راغلو، او زمونږ په مُلک کښې د قُمرۍ آواز اورېدے کيږى. ¹³د انځر ونه خپل انځر پخوى، او د انګورو تاکونه غوټۍ کوى؛ هغه خپله خوشبوئى خورَوى. پاڅه، اے زما محبوبې، اے زما ښکُلې، او راروانه شه. ¹⁴اے زما کوترې، د تيږې په چاودونو کښې، د چټان په پټو ځايونو کښې، زۀ دې مخ وګورم، ستا آواز دې واورم، ځکه چې ستا آواز خوږ دے، او ستا مخ ښکُلے دے. ¹⁵زمونږ دپاره ګيدړان ونيسئ، هغه وړوکى ګيدړان چې د انګورو باغونه برباد کوى، ځکه چې زمونږ د انګورو باغونه غوټۍ کوى. ¹⁶زما محبوب زما دے، او زۀ د هغۀ يم؛ هغه د سوسنو په مينځ کښې څرى. ¹⁷ترڅو چې ورځ سا واخلى او سيورى وتښتى، راوګرځه، اے زما محبوبه، او د هوسۍ په شان شه يا د ځوان هوسۍ په شان چې په ناهوارو غرونو باندې وى.