Ũkĩra, Wee Mwendwa Wakwa, na Ũũke Twathiĩ
Mũtumia nĩaragia, akĩririkana kĩĩruru gĩake, nyũmba ya iruga, guoko gwake rungu rwa mũtwe wake. Agacooka akoiga rĩngĩ ũrĩa aamwĩtire arĩ ngũ-inĩ ya ndirica: kĩheo kĩa heho gĩthirĩte, ngũyũ nĩiroha, ũka tũthiĩ. Maita meerĩ nĩakaanagia airĩtu a Jerusalemu matikaarahũre wendo ũtanahaarĩria.
2 1Niĩ ndĩ ihũa rĩa Sharoni, ihũa rĩa ituamba. 2O ta ihũa rĩrĩ gatagatĩ ka mĩigua, noguo mwendwa wakwa atariĩ gatagatĩ ka airĩĩtu. 3O ta mũtĩ wa matunda gatagatĩ ka mĩtĩ ya mũtitũ, noguo mwendwa wakwa atariĩ gatagatĩ ka aanake. Nĩndaikarĩire kĩĩruruinĩ gĩake ngenete mũno, namo matunda make maarĩ marĩo harĩ niĩ. 4Nĩandwarire nyũmbainĩ ya iruga, nayo bendera yake igũrũ rĩakwa yarĩ wendo. 5Nyiitĩrĩriai na thabibu nyũmithie, mũnjerũhie na matunda, nĩgũkorwo ndĩ mũrũaru nĩ wendo. 6Guoko gwake kwa ũmotho kũrĩ rungu rwa mũtwe wakwa, naguo guoko gwake kwa ũrĩo nĩkũũhĩmbĩrĩirie. 7Inyuĩ airĩĩtu a Jerusalemu, nĩndamwĩhĩtithia na thwara o na ngũrũ cia werũ: mũtikaarahũre kana mũũkĩrie wendo nginya rĩrĩa ũkeenda.
8Mũgambo wa mwendwa wakwa! Nĩ gũũka arooka, akĩrũgaga igũrũ rĩa irĩma, agĩtũrũhaga igũrũ rĩa tũrĩma. 9Mwendwa wakwa ahaana ta thwara kana ta njaũ ya thiiya. Ta rora, arũgamĩte thuutha wa rũthingo rwitũ, agĩcũthĩrĩria na ndiricainĩ, akĩrora na ihaaroinĩ. 10Mwendwa wakwa aranjĩĩra atĩrĩ: Ũkĩra, wee mwendwa wakwa, wee mũthaka wakwa, na ũũke twathiĩ, 11nĩgũkorwo kĩmera kĩa heho nĩgĩthirĩte; mbura nĩthirĩte ĩgĩĩthira. 12Mahũa nĩmeumĩrĩte thĩ, narĩo ihinda rĩa kũina nĩrĩkinyu, naguo mũgambo wa ndutura nĩũiguĩkĩte bũrũriinĩ witũ. 13Mũkũyũ nĩũrarũithia ngũyũ ciaguo, nayo mĩthabibu nĩĩraruta mahũa; nĩĩrarutaga mũtararĩko wayo mwega. Ũkĩra, wee mwendwa wakwa, wee mũthaka wakwa, na ũũke twathiĩ. 14Wee ndutura yakwa, ũrĩ mĩanyainĩ ya rwaro rwa ihiga, handũinĩ ha kwĩhitha ha kĩharũrũka, reke ndoone ũthiũ waku, reke ndũigue mũgambo waku, nĩgũkorwo mũgambo waku nĩ mũrĩo, naguo ũthiũ waku nĩ mũthaka. 15Tũnyiitĩrai mbwe, o tũbwe tũu tũnini tũrĩa tũthũkagia mĩgũnda ya mĩthabibu, nĩgũkorwo mĩgũnda iitũ ya mĩthabibu nĩĩraruta mahũa. 16Mwendwa wakwa nĩ wakwa, na niĩ ndĩ wake; we arĩithagia gatagatĩ ka mahũa. 17Nginya rĩrĩa mũthenya ũkaahũmũka, nacio ciĩruru ciũre, wĩhũgũre, wee mwendwa wakwa, na ũhaane ta thwara kana ta njaũ ya thiiya irĩmainĩ iria ndũrũ.