Orin Solomoni 2

2 ¹Òdòdó Ṣaroni ni mí, ìtànná lílì àwọn àfonífojì. ²Bí ìtànná lílì láàrín ẹ̀gún, bẹ́ẹ̀ ni olólùfẹ́ mi láàrín àwọn ọ̀dọ́bìnrin. ³Bí igi áppù láàrín àwọn igi inú igbó, bẹ́ẹ̀ ni olùfẹ́ ọkàn mi láàrín àwọn ọ̀dọ́kùnrin. Pẹ̀lú ìdùnnú ńlá ni mo jókòó sí abẹ́ òjìji rẹ̀, èso rẹ̀ sì dùn ní ẹnu mi. ⁴Ó mú mi wá sí gbọ̀ngàn àsè, àsíá rẹ̀ lórí mi sì jẹ́ ìfẹ́. ⁵Fi èso àjàrà gbígbẹ ró mi lẹ́yìn, fi áppù tù mí lára, nítorí àìsàn ìfẹ́ ń ṣe mí. ⁶Ọwọ́ òsì rẹ̀ wà lábẹ́ orí mi, ọwọ́ ọ̀tún rẹ̀ sì gbà mi mọ́ra. ⁷Mo fi yín bú, ẹ̀yin ọmọbìnrin Jerúsálẹ́mù, fi àwọn èsúró àti àwọn abo àgbọ̀nrín inú pápá: ẹ má ṣe rú ìfẹ́ sókè, ẹ má sì jí i títí yóò fi wù ú.

⁸Ohùn olùfẹ́ ọkàn mi! Ó ń bọ̀, ó ń fò lórí àwọn òkè ńlá, ó ń bẹ́ lórí àwọn òkè kéékèèké. ⁹Olùfẹ́ ọkàn mi dàbí èsúró tàbí ọ̀dọ́ àgbọ̀nrín. Wò ó, ó dúró níbẹ̀ lẹ́yìn ògiri wa, ó ń yọjú láti inú àwọn fèrèsé, ó ń wo inú láti inú àwọn ọ̀nà fèrèsé aláwọ̀tẹ́lẹ̀. ¹⁰Olùfẹ́ ọkàn mi wí fún mi pé: Dìde, olólùfẹ́ mi, arẹwà mi, kí o sì wá, ¹¹nítorí ìgbà òtútù ti kọjá; òjò ti dá, ó sì ti lọ. ¹²Àwọn òdòdó fara hàn lórí ilẹ̀, àkókò orin ti dé, ohùn àdàbà sì dún ní ilẹ̀ wa. ¹³Igi ọ̀pọ̀tọ́ ń pọ́n èso rẹ̀, àwọn àjàrà sì ń tanná; wọ́n ń rùn dídùn. Dìde, olólùfẹ́ mi, arẹwà mi, kí o sì wá. ¹⁴Àdàbà mi, tí ń bẹ nínú àwọn pàlàpálá àpáta, nínú àwọn ibi ìkọ̀kọ̀ orí òkè, jẹ́ kí n rí ojú rẹ, jẹ́ kí n gbọ́ ohùn rẹ, nítorí ohùn rẹ dùn, ojú rẹ sì lẹ́wà. ¹⁵Ẹ mú àwọn kọ̀lọ̀kọ̀lọ̀ fún wa, àwọn kọ̀lọ̀kọ̀lọ̀ kéékèèké tí ń ba ọgbà àjàrà jẹ́, nítorí àwọn ọgbà àjàrà wa ń tanná. ¹⁶Olùfẹ́ ọkàn mi jẹ́ ti èmi, èmi sì jẹ́ tirẹ̀; ó ń jẹko láàrín àwọn ìtànná lílì. ¹⁷Títí ọjọ́ yóò fi mí, tí àwọn òjìji yóò sì sá lọ, yí padà, olùfẹ́ ọkàn mi, kí o sì dàbí èsúró tàbí ọ̀dọ́ àgbọ̀nrín lórí àwọn òkè pàlàpàlà.