መዓልቲ መርዓ እቲ ንጉስ
እታ ሰበይቲ ነቲ እትፈትዎ ኣብታ ፀላም ከተማ ትደልዮ፥ ንዘብዐኛታት ትሓትት፥ ደሓር ከዓ ረኺባቶ፥ ናብ ገዛ ኣዲኣ ክሳዕ እተእትዎ ኣይትሓድጎን። ካልኦት ድምፅታት ድማ ነታ ዝተሓለወት ዓረብያ ሰሎሞን፥ ኣብ መዓልቲ መርዓኡ ዝተኸለለ ንጉስ፥ ክትቀርብ እንተላ ይጥምቱ።
3 1ኣብ መደቀስየይ ብለይቲ ነቲ ነፍሰይ እትፈትዎ ደለኽዎ፤ ደለኽዎ፥ ግና ኣይረኸብክዎን። 2ሕዚ ተሲአ ንኸተማ ክዘውር፥ ብኣውራ መንገድታትን ኣደባባያትን፤ ነቲ ነፍሰይ እትፈትዎ ክደሊ እየ። ደለኽዎ፥ ግና ኣይረኸብክዎን። 3እቶም ኣብ ከተማ እናዞሩ ዝነበሩ ዘብዐኛታት ረኸቡኒ። “ነቲ ነፍሰይ እትፈትዎ ርኢኹምዎዶ?” 4ገና ካባታቶም ሓሊፈ ነቲ ነፍሰይ እትፈትዎ ረኸብክዎ። ሒዘዮ ኸዓ ናብ ገዛ እነይ፥ ናብ ክፍሊ እታ ዝፀነሰትኒ ክሳዕ ዘእትዎ ክኸይድ ኣይሓደግክዎን። 5ኣትን ኣዋልድ ኢየሩሳሌም፥ በሰስሓታትን በዓጋዜን መሮርን ኣምሕለክን ኣለኹ፦ ንፍቕሪ ክሳዕ ባዕሉ ዝደሊ ኣይተለዓዕልኦን ኣይተበራብርኦን።
6እዚኣ ኻብ በረኻ ኸም ኣዕማድ ትኪ እትድይብ ዘላ፥ ብከርበን ብዕጣንን ብዅሉ ጥዑም ዝጨናኡ መረቕ ነጋዳይን ዝተቐብአት፥ መን እያ? 7እንሆ፥ ዓረብያ ሰሎሞን ባዕሉ እያ፥ ኣብ ዙርያኣ ድማ ስሳ ጀጋኑ፥ ካብ ጀጋኑ እስራኤል ዝኾኑ ኣለዉ፥ 8ኵሎም ኣስይፍቲ ዝሓዙ፥ ንውግእ ዝተላመዱ እዮም፤ ነፍሲ ወከፎም ድማ ኣንፃር ፍርሓት ለይቲ ሰይፉ ኣብ ጎኑ ዓጢቑ ኣሎ። 9ንጉስ ሰሎሞን ካብ ዕንፀይቲ ሊባኖስ ንባዕሉ ዓረብያ ገበረ። 10ኣዕምዳ ብብሩር፥ ድጋፋ ብወርቂ፥ መቐመጢኣ ብሓምራዊ ዓለባ ገበረ፤ ውሽጣ ድማ ብኣዋልድ ኢየሩሳሌም ብፍቕሪ ዝተነፀፈ ነበረ። 11ኣትን ኣዋልድ ፅዮን፥ ውፅኣ፤ ነቲ እኖኡ ኣብ መዓልቲ መርዓኡ፥ ኣብታ ልቡ ዝተሓጎሰላ መዓልቲ ዝደፍኣትሉ ኣኽሊል ተኸሊሉ ዘሎ ንጉስ ሰሎሞን ጠምትኦ።
