پادشاهین توی گونو
آرواد قارانلیق شهری سِودئیئنی تاپماق اوچون آختاریر، گؤزَتچئلردن سوروشور، سونرا اونو تاپیر و آناسینین اِوئنه گتئرَنه قدر اَلئندن بوراخمیر. سونرا باشقا سَسلر سولیمانین موحافئظت اولونان تخت‌رِوانینین یاخینلاشماسینا باخیرلار؛ پادشاه توی گونونده باشینا تاج قویولموشدور.
3 1گجه بویو یاتاغیمدا جانیمین سِودئیئنی آختاردیم؛ اونو آختاردیم، آمّا تاپمادیم. 2ائندی قالخیب شهری دولاناجاغام، کوچه‌لرده و مئدانلاردا؛ جانیمین سِودئیئنی آختاراجاغام. اونو آختاردیم، آمّا تاپمادیم. 3شهری دولانان گؤزَتچئلر منی تاپدیلار. «جانیمین سِودئیئنی گؤروبسونوز؟» 4اونلاردان تزه‌جه کچمئشدئم کی، جانیمین سِودئیئنی تاپدیم. اونو توتوب قویمادیم گتسئن، نه قدر کی اونو آنامین اِوئنه، منه بویلو اولانین اوتاغینا گتئرمه‌دئم. 5ای اورشلئم قیزلاری، چؤلون جیرانلاری و مارال‌لاری حاقّی سئزه آند ورئرم: محبّتی، اؤزو ائسته‌ینه قدر قالدیرمایین و اویاتمایین.
6چؤللوکدن توستو سوتونلاری کئمی قالخان، مور و کوندورله، تاجئرئن بوتون عطئرلی توزلاری ائله عطئرلَنمئش بو کئمدئر؟ 7باخین، بو سولیمانین اؤز تخت‌رِوانی‌دیر، اطرافیندا آلتمیش ائگئد وار، ائسرایئلئن ائگئدلرئندن، 8هامیسی قیلینج توتموش، دؤیوشه تعلئم گؤرموش، هر بئری قیلینجی بؤیرونده، گجه‌نئن دهشتئنه قارشی. 9سولیمان پادشاه اؤزو اوچون لوبنانین آغاجیندان بئر تخت‌رِوان دوزَلتدی. 10اونون دئرَکلرئنی گوموشدن، آرخاسینی قیزیلدان، اوتوراجاغینی ارغوانیدن دوزَلتدی؛ اونون ائچی اورشلئم قیزلاری طرفئندن محبّتله بَزَدئلمئشدی. 11ای صحیون قیزلاری، چیخین و سولیمان پادشاها باخین، آناسینین توی گونونده، اوره‌یئنئن سوئندئیی گونده باشینا قویدوغو تاجی گیمئش.
