Mbeba moko te kati na yo
Mobali apesi mwasi matondi na ndenge na ndenge ya nzoto na ye, abengi ye mwasi na ye ya libala mpe ndeko na ye ya mwasi, alobi ete mbeba moko azali na yango te. Azali elanga ekangami na saki, liziba etiamami élembo, ya ye moko. Na suka ye ayanoli, abengi mompepe mpe afungoli elanga yango ye moko.
4 1Ozali kitoko boni, bolingo na ngai, ozali kitoko boni! Miso na yo ezali bangunda nsima ya elamba na yo ya elongi. Suki na yo ezali lokola etonga ya bantaba ekiti na bangomba ya Galadi. 2Mino na yo ezali lokola etonga ya bampate basi oyo bakataki suki na bango sika, bazali komata longwa na esika ya kosukola, nyonso ezali na mapasa, mpe moko te kati na yango abungisi mwana na ye. 3Bibebu na yo ezali lokola nsinga ya motane, mpe monoko na yo ezali kitoko. Matama na yo ezali lokola biteni mibale ya grenade nsima ya elamba na yo ya elongi. 4Nkingo na yo ezali lokola ndako molai ya Davidi, etongami na milongo ya mabanga; likolo na yango etiami ngabo nkoto moko, nyonso ezali ngabo ya mobundi. 5Mabele na yo mibale ezali lokola bana mibale ya mbuli, mapasa ya mbuli ya mwasi, ezali kolia kati na bafololo. 6Tii mokolo ekopema mpe bilili ekokima, nakokende na ngomba ya mira mpe na ngomba moke ya ensense. 7Ozali kitoko mobimba, bolingo na ngai; mbeba moko te ezali kati na yo.
8Yaka elongo na ngai longwa na Liban, mwasi na ngai ya libala; yaka elongo na ngai longwa na Liban. Tala na nse longwa na tongo ya Amana, longwa na tongo ya Senir mpe Hermoni, longwa na mabulu ya bankosi, longwa na bisika ya bangomba oyo bankoi bafandaka. 9Osimbi motema na ngai, ndeko na ngai ya mwasi, mwasi na ngai ya libala; osimbi motema na ngai na tala moko ya miso na yo, na libanga moko ya mokaba na yo. 10Bolingo na yo ezali kitoko boni, ndeko na ngai ya mwasi, mwasi na ngai ya libala! Bolingo na yo eleki vinyo boni, mpe nsolo malamu ya mafuta na yo eleki biloko nyonso ya nsolo malamu! 11Bibebu na yo ezali kotiola mai ya nzoi, mwasi na ngai ya libala; mafuta ya nzoi mpe miliki ezali na nse ya lolemo na yo, mpe nsolo malamu ya bilamba na yo ezali lokola nsolo malamu ya Liban.
12Elanga ekangami ezali ndeko na ngai ya mwasi, mwasi na ngai ya libala, liziba ekangami, liziba oyo etiami elembo. 13Bitape na yo ezali elanga ya bagrenade elongo na mbuma ya malamu koleka, hena elongo na nard, 14nard mpe safran, kalame mpe kanele, elongo na nzete nyonso ya ensense, mira mpe aloes, elongo na biloko nyonso ya nsolo malamu koleka. a a v14 Kalame ezali matiti ya nsolo malamu oyo basalelaka lokola eloko ya nsolo malamu. 15Ozali liziba ya elanga, libulu ya mai ya bomoi, mpe bibale ezali kokita longwa na Liban. 16Lamuka, mopepe ya nord, mpe yaka, mopepe ya sud! Pepa likolo na elanga na ngai, mpo ete nsolo malamu na yango esopana. Tika ete mobali na ngai ya bolingo ayaka kati na elanga na ye mpe alia mbuma na yango ya malamu koleka.
