അവന്റെ അഭിലാഷം എന്നോടാകുന്നു
ചെരിപ്പിട്ട പാദങ്ങൾ മുതൽ മുടി വരെ പുരുഷൻ അവളെ പുകഴ്ത്തുന്നു, അവളിൽ തുറന്ന് ആനന്ദിക്കുന്നു. അവൾ അത് ഒഴിഞ്ഞുമാറ്റുന്നില്ല. ആ ആഗ്രഹം പരസ്പരമുള്ളതും തന്റേതുമാണെന്ന് അവൾ അവകാശപ്പെടുന്നു; പിന്നെ അവനെ മുന്തിരിത്തോട്ടങ്ങളിലേക്കും ഗ്രാമങ്ങളിലേക്കും കൂട്ടിക്കൊണ്ടുപോകുന്നു, അവിടെ അവൾ അവനുവേണ്ടി ഫലങ്ങൾ സൂക്ഷിച്ചുവെച്ചിട്ടുണ്ട്.
7 1പാദുകങ്ങളണിഞ്ഞ നിന്റെ കാലുകൾ എത്ര സുന്ദരം, കുലീനപുത്രീ! നിന്റെ തുടകളുടെ വളവുകൾ രത്നങ്ങൾപോലെ, വിദഗ്ധശില്പിയുടെ കൈകളുടെ വേലപോലെ. 2നിന്റെ നാഭി കലർത്തിയ വീഞ്ഞ് ഒരിക്കലും കുറയാത്ത വട്ടപ്പാത്രം. നിന്റെ ഉദരം താമരപ്പൂക്കളാൽ ചുറ്റപ്പെട്ട ഗോതമ്പുകൂമ്പാരം. 3നിന്റെ രണ്ടു മാറിടങ്ങൾ രണ്ടു മാൻകുട്ടികൾപോലെ, ഒരു ചിറ്റമാനിന്റെ ഇരട്ടക്കുട്ടികൾ. 4നിന്റെ കഴുത്ത് ആനക്കൊമ്പിന്റെ ഗോപുരംപോലെ. നിന്റെ കണ്ണുകൾ ബത്ത്-റബ്ബീം കവാടത്തിനരികെ ഹെശ്ബോനിലെ ജലാശയങ്ങൾ. നിന്റെ നാസിക ദമസ്കോസിന് നേരേ നോക്കുന്ന ലെബനോനിലെ ഗോപുരംപോലെ. 5നിന്റെ ശിരസ്സ് കർമേൽമലപോലെ നിന്നെ അലങ്കരിക്കുന്നു, നിന്റെ അഴിഞ്ഞൊഴുകുന്ന മുടി ധൂമ്രവർണംപോലെ; ഒരു രാജാവ് അതിന്റെ ചുരുളുകളിൽ ബന്ധിതനായിരിക്കുന്നു. 6പ്രിയേ, നിന്റെ എല്ലാ ആനന്ദങ്ങളുമായി നീ എത്ര സുന്ദരി, എത്ര മനോഹരി! 7നിന്റെ ഉയരം ഒരു ഈന്തപ്പനപോലെ, നിന്റെ മാറിടങ്ങൾ അതിന്റെ കുലകൾപോലെ. 8“ഞാൻ ഈന്തപ്പനയിൽ കയറി അതിന്റെ ഫലം പിടിക്കും” എന്നു ഞാൻ പറഞ്ഞു. നിന്റെ മാറിടങ്ങൾ മുന്തിരിവള്ളിയുടെ കുലകൾപോലെയും നിന്റെ ശ്വാസത്തിന്റെ സൗരഭ്യം ആപ്പിൾപഴങ്ങൾപോലെയും ആകട്ടെ, 9നിന്റെ വായ് വിശിഷ്ടമായ വീഞ്ഞുപോലെ. അത് എന്റെ പ്രിയനുവേണ്ടി സ്വച്ഛമായി ഒഴുകുന്നു, അധരങ്ങൾക്കും പല്ലുകൾക്കുംമീതെ മൃദുവായി ഒഴുകുന്നു.
10ഞാൻ എന്റെ പ്രിയന്റേതാകുന്നു, അവന്റെ അഭിലാഷം എന്നോടാകുന്നു. 11വരൂ, എന്റെ പ്രിയനേ, നമുക്ക് വയലുകളിലേക്ക് പുറപ്പെട്ട് ഗ്രാമങ്ങളിൽ രാത്രി കഴിക്കാം. 12നമുക്ക് അതിരാവിലെ മുന്തിരിത്തോട്ടങ്ങളിലേക്ക് പോകാം, മുന്തിരിവള്ളികൾ തളിർത്തുവോ, പൂക്കൾ വിരിഞ്ഞുവോ, മാതളനാരകങ്ങൾ പൂവിട്ടുവോ എന്നു നോക്കാം. അവിടെവെച്ച് ഞാൻ നിനക്ക് എന്റെ പ്രണയം നല്കും. 13ദൂദായിപ്പഴങ്ങൾ തങ്ങളുടെ സൗരഭ്യം പരത്തുന്നു, നമ്മുടെ വാതിലുകൾക്കുമീതെ, എന്റെ പ്രിയനേ, നിനക്കുവേണ്ടി ഞാൻ സൂക്ഷിച്ചുവെച്ച, പുതിയതും പഴയതുമായ വിശിഷ്ടമായ സകല ഫലങ്ങളുമുണ്ട്. a a v13 ദൂദായിപ്പഴങ്ങൾ സുഗന്ധമുള്ള സസ്യങ്ങളായിരുന്നു; പ്രണയാഭിലാഷം ഉണർത്തുവാനും സന്താനഭാഗ്യം വർധിപ്പിക്കുവാനും അവയ്ക്ക് കഴിയുമെന്ന് പുരാതനലോകത്ത് വ്യാപകമായി വിശ്വസിക്കപ്പെട്ടിരുന്നു.
