Nkunga wa Mikunga 7 FHB Father's Heart Bible™

7 ¹Kitoku zenina thambi zaku muna tsabatu, a mwana wa mukhetu wa kitoku! Ndonga za mabunda maku zenina hanga bima bya thalu, kisalu kya moku ma nganga wa mudimu. ²Difunda dyaku dyenina longa dya luzyengu, dina dikondiku vinu dya kusanga. Kundu kyaku kyenina hanga mfunda ya bule, yizyetukulu yi bithundu. ³Mayeni maku modi menina hanga bana modi ba nsesi, mapasa ma nkayi. ⁴Tsingu yaku yenina hanga kibaka kya menu ma nzau. Mesu maku menina hanga maziba ma ku Hesiboni, bela-bela yi mwelu wa Bati-labimi. Mbombo yaku yenina hanga kibaka kya Libani, kina kisi tala kuna Tamasi. ⁵Mutwa waku wenina hanga mongu Kalumeli, amana tsuki za kaleyi zenina hanga kabengi; kyamvu wenina wakwatama hanga mu boloku mu mahunga ma tsuki zaku. ⁶Abweti kitoku yi dya kyesi bwenina ngeyi, a watondama, ni tsambu zaku zoosu! ⁷Mutela waku wenina hanga miti wa mbati, amana mayeni maku menina hanga bibundu bya wawu. ⁸Yázonza: «Yikatómbuka miti wa mbati amana yisimba bibundu bya wawu.» Mayeni maku makala hanga bibundu bya vinu, amana mvumba ya mwela waku hanga mapoma, ⁹amana munwa waku wenina hanga vinu dya bukheti. Dyenina kwenda bwambote kwena watondama wama, mu kudiodila malembi hana malebu yi menu.

¹⁰Meni yenina wa watondama wama, amana tsambu yandi yenina kwena meni. ¹¹Awisa, a watondama wama, tulubukenu ku bilanga amana tunimba muna mahata. ¹²Tukwendenu muna suka ku bilanga bya vinu, amana tutala keti vinu dyamenini, keti mintesi myayafuludini amana malenadi mamena bintesi. Kwakuna yikuheka lungongu lwama. ¹³Miti mya mandalake misi kandumuka mvumba ya myawu, amana hana mwelu wetu hwenina bibundu byosu bya kitoku, bya pha yi bya thama, bina yásweka kikuma kya ngeyi, a watondama wama. ^a a v13 Mandalake yákala miti mya mvumba, mina batu ba thama bákwikilaka ni misi sikumuna tsambu ya kinzola amana misi buwisa mu kubuta bana.