Nʼakɔnnɔ Wɔ Me Ho
Ɔbarima no kamfo no fi ne nan a mpaboa wom so kosi ne tirinwi, na n'ani gye ne ho pefee. Ɔbea no mpo nkamfo no. Ɔka sɛ akɔnnɔ no yɛ wɔn baanu nyinaa de, ne de nso, na afei odi n'anim kɔ bobe nturo ne nkuraa mu, baabi a wakora nnuaba ama no.
7 1Wo nan yɛ fɛ dɛn ara wɔ mpaboa mu, odehye babea! Wo srɛ a ɛkyea fɛfɛɛfɛ no te sɛ abo a ɛsom bo, odwumfo nimdefo nsa ano adwuma. 2Wo funuma yɛ kuruwa kurukuruwa a bobesa a wɔafra no nyera mu da. Wo yafunu yɛ awi a wɔaboaboa ano a sukooko atwa ho ahyia. 3Wo nufu abien te sɛ ɔforote mma abien, ɔforote bi nta. 4Wo kɔn te sɛ abantenten a wɔde asonse ayɛ. Wʼaniwa yɛ nsutare a ɛwɔ Hesbon, wɔ Bat-Rabim pon ano. Wo hwene te sɛ Lebanon abantenten a ɛhwɛ Damasko so. 5Wo ti yɛ wo ahenkyɛ te sɛ Karmel, na wo tinwi a ɛsensɛn no te sɛ kɔkɔɔ beredum; wɔde ne mmɔsɔ akyekyere ɔhene bi. 6Ahoɔfɛ ne anika dɛn ara na wowɔ, me dɔfo, wɔ wʼanigyede nyinaa mu! 7Wo tenten te sɛ abɛ dua, na wo nufu te sɛ ne aba nkuw. 8Mekae se, “Mɛforo abɛ dua no na mɛso ne aba mu.” Ma wo nufu nyɛ sɛ bobe aba nkuw, na wo home mu hua nyɛ sɛ aprɛ, 9na wʼanom nyɛ sɛ bobesa a ɛyɛ papa sen biara. Ɛsen brɛoo ma me dɔfo, ɛfa ano ne se so brɛoo.
10Me dɔfo dea ne me, na nʼakɔnnɔ wɔ me ho. 11Bra, me dɔfo, ma yɛnkɔ mfuw mu na yɛnkɔda nkuraa mu. 12Ma yɛnsɔre anɔpa ntɛm nkɔ bobe nturo mu na yɛnhwɛ sɛ bobe no afifiw, sɛ nhwiren no apae na ɛnyankoma no rehwiren anaa. Ɛhɔ na mede me dɔ bɛma wo. 13Manderaka no hua pa bɔ, na yɛn apon ano so na aba a ɛyɛ papa sen biara nyinaa wɔ, foforo ne dedaw, a makora so ama wo, me dɔfo. a a v13 Manderaka yɛ nnua a ɛhua pa a tete wiase no mu nnipa pii gye dii sɛ ɛkanyan ɔdɔ akɔnnɔ na ɛma obi tumi wo mma.
