غزل الغزلات 7

7 ¹اے شریف زادی، تیرے پاؤں جوتیوں میں کتنے خوبصورت ہیں! تیری رانوں کے خم جواہرات کی مانند ہیں، جو کسی ماہر کاریگر کے ہاتھوں کی صنعت ہو۔ ²تیری ناف ایک گول پیالہ ہے جس میں آمیختہ مَے کبھی کم نہیں ہوتی۔ تیرا پیٹ گیہوں کا ڈھیر ہے جو سوسنوں سے گِھرا ہوا ہے۔ ³تیری دونوں چھاتیاں دو ہرنوٹوں کی مانند ہیں، جو غزال کے جُڑواں بچے ہوں۔ ⁴تیری گردن ہاتھی دانت کے بُرج کی مانند ہے۔ تیری آنکھیں حسبون کے حوض ہیں، بت ربّیم کے پھاٹک کے پاس۔ تیری ناک لبنان کے بُرج کی مانند ہے، جو دمشق کی طرف تکتا ہے۔ ⁵تیرا سر کرمل کی مانند تجھ پر تاج ہے، اور تیری لہراتی زُلفیں ارغوانی رنگ کی مانند ہیں؛ ایک بادشاہ اُن کی لٹوں میں اسیر ہے۔ ⁶اے محبوبہ، تُو کتنی خوبصورت اور کتنی دلکش ہے، اپنی تمام لطافتوں کے ساتھ! ⁷تیرا قد کھجور کے درخت کی مانند ہے، اور تیری چھاتیاں اُس کے گُچھوں کی مانند۔ ⁸میں نے کہا، ”میں کھجور کے درخت پر چڑھوں گا اور اُس کے پھل کو تھام لوں گا۔“ تیری چھاتیاں انگور کے گُچھوں کی مانند ہوں، اور تیرے سانس کی خوشبو سیبوں کی مانند، ⁹اور تیرا منہ بہترین مَے کی مانند ہو۔ وہ میرے محبوب کے لیے نرمی سے بہتی ہے، ہونٹوں اور دانتوں پر آہستگی سے پھسلتی ہوئی۔

¹⁰میں اپنے محبوب کی ہوں، اور اُس کی چاہت میرے لیے ہے۔ ¹¹آ، اے میرے محبوب، ہم کھیتوں میں نکل چلیں اور گاؤں میں رات گزاریں۔ ¹²ہم صبح سویرے تاکستانوں میں چلیں اور دیکھیں کہ انگور کی بیلوں میں کونپلیں پھوٹیں یا نہیں، کہ شگوفے کھلے یا نہیں اور انار پھولے یا نہیں۔ وہاں میں تجھے اپنی محبت دوں گی۔ ¹³مردم گیاہ اپنی خوشبو دیتے ہیں، اور ہمارے دروازوں پر ہر طرح کے بہترین پھل ہیں، نئے اور پرانے، جو میں نے تیرے لیے، اے میرے محبوب، جمع کر رکھے ہیں۔ ^a a v13 مردم گیاہ خوشبودار پودے تھے جن کے بارے میں قدیم دنیا میں عام طور پر یہ خیال کیا جاتا تھا کہ وہ عشق کی خواہش کو اُبھارتے اور زرخیزی کو بڑھاتے ہیں۔