Awit ni Solomon 7

7 ¹Kay ganda ng iyong mga paa sa sandalyas, marangal na anak na babae! Ang mga kurba ng iyong mga hita ay tulad ng mga hiyas, ang gawa ng mga kamay ng dalubhasang manggagawa. ²Ang iyong pusod ay isang mabilog na mangkok na hindi kailanman nagkukulang ng hinalong alak. Ang iyong tiyan ay isang bunton ng trigo na napaliligiran ng mga liryo. ³Ang iyong dalawang dibdib ay tulad ng dalawang batang usa, kambal ng isang gasela. ⁴Ang iyong leeg ay tulad ng isang toreng garing. Ang iyong mga mata ay mga lawa sa Hesbon, sa tabi ng pintuan ng Bat-rabim. Ang iyong ilong ay tulad ng tore ng Lebanon, na nakatanaw sa Damasco. ⁵Ang iyong ulo ay nagpuputong sa iyo tulad ng Carmel, at ang iyong nakalugay na buhok ay tulad ng kulay-ube; isang hari ay nabihag sa mga tirintas nito. ⁶Kay ganda at kay kaaya-aya mo, aking irog, sa lahat ng iyong mga kariktan! ⁷Ang iyong tikas ay tulad ng puno ng palma, at ang iyong mga dibdib ay tulad ng mga buwig nito. ⁸Sinabi ko, “Aakyat ako sa puno ng palma at hahawakan ko ang mga bunga nito.” Nawa ang iyong mga dibdib ay maging tulad ng mga buwig ng puno ng ubas, at ang halimuyak ng iyong hininga ay tulad ng mga mansanas, ⁹at ang iyong bibig ay tulad ng pinakamainam na alak. Umaagos itong marahan para sa aking minamahal, dumudulas na banayad sa mga labi at ngipin.

¹⁰Ako ay sa aking minamahal, at ang kanyang pagnanasa ay para sa akin. ¹¹Halika, aking minamahal, lumabas tayo sa mga parang at magpalipas ng gabi sa mga nayon. ¹²Maaga tayong pumunta sa mga ubasan at tingnan kung nagkabuko na ang mga puno ng ubas, kung nagbukadkad na ang mga bulaklak at namumulaklak na ang mga granada. Doon ko ibibigay sa iyo ang aking pag-ibig. ¹³Ang mga mandragora ay naglalabas ng kanilang halimuyak, at nasa itaas ng ating mga pintuan ang lahat ng pinakamainam na bunga, bago at luma, na aking itinago para sa iyo, aking minamahal. ^a a v13 Ang mga mandragora ay mababangong halaman na malawakang pinaniniwalaan sa sinaunang daigdig na nagpapasigla ng pagnanasang romantiko at nagpapalakas ng pagkamayabong.