Maysa a Selio iti Puso

Tarigagayan ti babai a maipakitana a siaba-abagan ti ayatna nga awan ti mangumsi kenkuana, ket dawatenna a maikabil kas selyo iti pusona. Napigsa ti ayat a kas iti ipapatay, gil-ayab ni Amatayo a saan a mamalmes dagiti layus ken umsien laeng ti kuarta. Pinilina para iti bagina.

Kapitulo 8.

O, no la koma nga kas kabsat a lalaki ka kaniak, a nagsuso kadagiti suso ni inak! No masarakanka iti ruar, ikissakanto, ket awanto ti mangumsi kaniak. Idalankanto ken iyegkanto iti balay ni inak—isu a nangisuro kaniak. Paimnekanto iti naruay nga arak, iti katas ti granada a kukuak. Ti kannigidna ket adda iti sirok ti ulok, ket yakapennak ti kanawanna. Idawatko kadakayo, annak a babbai ti Jerusalem: dikay pagsubenen wenno riingen ti ayat agingga a maay-ayan.

Siasino daytoy a rumuar manipud iti let-ang, a nakasanday iti ay-ayatenna? Iti sirok ti kayo a mansanas, riningkanka; sadiay nagsakit ti inam gapu kenka, sadiay nagsakit daydiay nangipasngay kenka.

Ikabilnak a kas selio iti pusom, kas selio iti takkiagmo; ta kas iti patay ti kapigsa ti ayat, ti panagimonna di agpaakar a kas iti tanem. Agsilnag a kas iti apuy, ti mismo a gil-ayab ni Amatayo. ^a Saan a mapapatay dagiti adu a danum ti ayat, wenno maiyanod dagiti karayan. No ti maysa a lalaki mangted iti amin a kinabaknang ti balayna gapu iti ayat, naan-anay a mauyawto.

Adda maysa a ubing a kabsatmi a babai, ket awan pay ti sususona. Ania ti aramidenmi para iti kabsatmi iti aldaw a madawat isuna a mapagasawa? No pader isuna, ibangonmi iti rabawna ti torre a pirak; ngem no ridaw isuna, sarraanmi isuna kadagiti tabla a sedro.

Siak ket pader, ket dagiti sususok kas dagiti torre; ket iti imatangna, nagbalinak a kas iti makasarak iti kappia. Adda ubasan ni Solomon idiay Baal-hamon; impaarendana dayta kadagiti managtaltalon, ket tunggal maysa ket mangiyeg iti 1,000 a pidaso a pirak para iti bungana. Ti ubasanko, ti mismo a kukuak, ket adda iti sangoanak. Kukuam, Solomon, dagiti 1,000, ken 200 para kadagiti mangbantay iti bungana.

Sika nga agnanaed kadagiti minuyongan, dagiti gagayyemko ket dumdumngegda iti timekmo; palubosannak a mangngeg dayta.

Umayka a dagus, ay-ayatek, ket agbalinka a kas iti gasela wenno ubing nga ugsa kadagiti bantay dagiti rekado.