A Seal Wey Dey For Heart

The woman wish say she fit show her love for open without people to look her down, and she ask make e set her like seal for him heart. Love strong like death, na fire from we Papa wey flood no fit quench and money go only insult. Na she choose for herself.

Chapter 8.

Oh, if only you be like broda to me, wey suck for my mama breast! If I see you outside, I go kiss you, and nobody go look me anyhow. I go lead you and carry you enter my mama house—she wey teach me. I go give you wine wey get spice make you drink, di juice of my pomegranate. Im left hand dey under my head, and im right hand dey hold me tight. I dey beg una, una daughters of Jerusalem: no gbage or wake love until di time wey e ready.

Na who be dis wey dey comot from di desert, wey lean for di one wey she love? Under di apple tree I wake you; na dia your mama labour for you, na dia she wey born you labour.

Put me like seal for your heart, like seal for your arm; because love strong like death, im jealousy hard like grave. E dey flash like fire, di very flame of our Papa. ^a Plenty waters no fit quench love, and rivers no fit carry am comot. If man offer all di wealth of im house for love, dem go just scorn am well well.

We get one small sister, and she never get breast. Wetin we go do for our sister for di day wey dem go ask for her hand? If she be wall, we go build tower of silver ontop am; but if she be door, we go cover am with cedar board.

I be wall, and my breast be like towers; den for im eye I come be like person wey don find peace. Solomon get one vineyard for Baal-hamon; e rent am give farmers wey go work am, and each one suppose bring 1,000 pieces of silver for im fruit. My own vineyard, wey na my very own, dey my front. Di 1,000 na your own, Solomon, and 200 for dem wey dey keep im fruit.

You wey dey live inside di gardens, my companions dey listen for your voice; make I hear am.

Come quick, my beloved, and be like gazelle or young stag ontop di mountains of spices.