John 1

1 ¹Haokaphokli Tui chi leisai, kala Tui chi ithumwui Avāli ngasoda leisai, kala Tui chi Varena. ²Ana haokaphokli ithumwui Avāli ngasoda leisai. ³Ot saikora chi awui mangā eina sākhui, kala awui maningla sākhui kaji khikha akhala masākhuimana. ⁴Awuili kharing leisai, kala kharing chi mi saikorawui kahorna. ⁵Kahor china tangkhamangli horshoka, kala tangkhamangna chili mayuimana.

⁶Ithumwui Avāwui eina chihovā kahai John kaho mi akha rāhaira. ⁷Ana kahorwui pongli shākhi sākhavai shākhi kasaa rāhaira, chieina mi saikorana Johnwui shākhi mangā eina shitkasangra. ⁸Ana kahor maningmana, kha kahorwui pongli shākhi sākhavai rāhaira. ⁹Mi saikora kachiva̱li kahor khami khamashunga kahor chi okathuili rārāsai. ¹⁰Ana okathuili leisai. Okathui chi awui mangā eina sākhui, chithālala okathuina ali matheimana. ¹¹Ana khalattawuili rāhaira, kha awui khalattawui mibingna ali makhuisangmana. ¹²Kha ali khuisangda awui mingli shitkasanga mi saikorali, ithumwui Avāwui naongarā ngasā khavai pangshap chi ana mi, ^a a v12 Jishuli samphanga mibingli ithumwui Avāwui naongarā ngasā khavai pangshap mihaira — awui Naomayara chihovā kahaiwui shimkhurli latung ngasak kahaina. ¹³athum ashee eina maning, phasāwui ningkachāng eina maning, miwui ningkachāng eina maning, kha ithumwui Avāwui eina pharā kahaina.

¹⁴Tui chi phasā ngasāhaowa kala ithumwui alungli pamhaowa. Lukhamashan kala khamashungna pemhaida Avāwui eina kharā Naohonaotongwui tekhamatei, awui tekhamatei chi ithumna theihaira. ¹⁵Johnna awui pongli shākhi sāda panglāk eina hānga, "Hi china ina kahāng kahaina: iwui thili kharā a china ili reimei, kaja a ili rida leikasāna." ¹⁶Kaja awui khangachā chiwui eina ithum saikorana lukhamashan tākahai lukhamashan samphanga. ¹⁷Kaja ain chi Moseswui mangā eina mihaira; lukhamashan kala khamashung chi Jishu Khristawui mangā eina kharāhaira. ¹⁸Khipānakha ithumwui Avāli theilakrangmana; Avā ngasopamda khalei Naohonaotong chinana ali theingasakhaira. ^b b v18 Ithumwui Avāwui wuklungli katang ngasopamching Anaomayara mānga ithumli ithumwui Avā khamashunga khipākhala kaji theingasak samphangra — Avāli theikhami kachiva̱ chi Jishuwui mangā eina kharāna.

Na Khipākhala, John?

¹⁹Jihudibingna Jerusalemwui eina pāngmonbing eina Levinaobingli ali "Na khipāna?" da khangahān khavai chihovā tharan, hi Johnwui shākhina. ²⁰Ana hāngphata, kala mahorhaimana, kha hāngphata, "I Khrista maningmana."

²¹Chieina athumna ali ngahāna, "Chithākha khikhala? Na Elijahna?" "I maningmana," da ana hānga. "Na marān chi khala?" "Chi maningmana," da ana ngahānkai.

²²Chieina athumna ngahāna, "Na khipāna? Ithumli kachihovābingli ngahānkā khavai lei. Na khalattawui vang khi hāngkhala?"

²³Ana hānga, "Marān Isaiahna hānghaikasā thada, I lamhāngli 'Prohowui shongfa ngatar ngasaklu' da vaozata akhon akhana."

²⁴Athum china Phariseebingwui eina chihovā kahaina. ²⁵Athumna ali ngahāna, "Na Khrista maningla, Elijahla maning, marānla maningakha, chithākha khisāda ra̱hikmikhala?"

²⁶Johnna athumli ngahānkai, "Ina tara̱ eina ra̱hikmi, kha nathumwui ngachaili nathumna matheia akha nganinga, ²⁷iwui thili rārā a chi, awui pheihop khara̱ khalāmi khavai I matik machāmana." ²⁸Ot hibing Jordan kongwui zimikshovāk Johnna ra̱hikmikapam Bethanyli shokkahaina.

Yanglu, Yaonao Chi

²⁹Akhama kathā Johnna Jishu awuishong rārā chi theilaga hānga, "Yanglu! ithumwui Avāwui Yaonao—Jishu—okathuiwui morei chi khuithuia! ^c c v29 Johnna Jishuli "ithumwui Avāwui Yaonao" da hoi, kaja Yaonao chi kamia a chi Avāna kajina — Abrahamli "Varena awui vang yaonao chi khangarān sara" da tui kamia Avā akhamānga, ara tui chi awui khalattawui Naomayarali ungshungvai ngasakna. ³⁰Hi ina kahāng a chi kajina: 'Iwui thili rārāda khalei mi akha chi ili reimei, kaja ana ili rida leihaina.' ³¹Ina ali matheimana, kha a chi Israelli phongmi khavai tara̱ eina ra̱hikmida kharāna." ³²Johnna shākhi sāda hānga: "Manglā Kathara chi nāsha̱ thada kazingramwui eina tāda, awuitungli zangkahai chi ina thei. ³³Ina ali matheimana, kha tara̱ eina ra̱hikmi khavai ili kashirāta china ili hānga, 'Manglā Kathara chi tākapa̱da awuitungli zangkahai nana katheia a chi Manglā Kathara eina ra̱hikmia chi kajina.' ³⁴Kala ina theihaira, kala hi ithumwui Avāwui Naomayarana da shākhi sāhaira." ^d d v34 Johnwui shākhina Jishuli ithumwui Avāwui Naomayarana da hoi — "Varewui naomayara akha" akhamāng maningla, kha okathui leirangda eina Avāna leishikahai katang makhavai Naomayara chi kajina.

Rāda Yanglu

³⁵Akhama kathā Johnna awui sākhangatha̱ khani ngasoda nganingluishita, ³⁶kala Jishu rārāda leilakha ali yangtitta hānga, "Yanglu! ithumwui Avāwui Yaonao!" ³⁷Sākhangatha̱ khani china awui kahāng chi shālaga, ani Jishuli shurthuwa.

³⁸Jishuna kapeikhaung eina athum shurrā chi theilaga hānga, "Nathum khi phāda leikhala?" Athumna hānga, "Ojā" (tamchitheime kaho), "na kali pamda leikhala?"

³⁹Ana athumli hānga, "Ralu, chithākha nathumna theira." Chieina athum vāda ana kali pamda lei chi theilaga, chithang awuili ngasoda pamsai. Chi pung mati katā atamlina.

⁴⁰Johnwui kahāng shālaga Jishuli shurrā khani chiwui ngachaili akha chi Simon Peterwui agato Andrewna. ⁴¹Ana khare eina awui agato Simonli phākhuida hānga, "Ithumna Messiahli phāhaira" (chiwui kakhalata Khrista kajina).

⁴²Ana ali Jishuwuili khuirai. Jishuna ali yangtitlaga hānga, "Na Johnwui naomayara Simonna. Nali Cephas hora" (chiwui kakhalata Peter kajina).

⁴³Akhama kathā Jishuna Galileeli vākhavai phaninghaowa. Ana Philipli phākhuida hānga, "Ishurlu."

⁴⁴Chitharan Philip hi Andrew eina Peterwui keinung Bethsaidawui mina. ⁴⁵Philipna Nathana-elli phākhuida hānga, "Moseswui ain lairikli kala marānbingna kapi kahai mipā Nazarethwui Josephwui naomayara Jishuli ithumna phāhaira."

⁴⁶Nathana-elna hānga, "Nazarethwui eina kaphā ot akha kharā samphangrala?" Philipna hānga, "Rāda yanglu."

⁴⁷Jishuna Nathana-el rārā chi theilaga awui pongli hānga, "Yanglu—kachangkhat Israelwui mi akha, awuili mikhanam maleimana!"

⁴⁸Nathana-elna ali ngahāna, "Kathada nana ili theikhala?" Jishuna ngahānkai, "Philipna nali mahokhuiranglakha, na khaorārong azingli leilakha, ina nali theihaira."

⁴⁹Nathana-elna ali ngahānkai, "Ojā, Na ithumwui Avāwui Naomayarana! Na Israelwui Awungana!"

⁵⁰Jishuna ali ngahānkai, "Na khaorārong azingli theihaira da ina nali kahāng chiwui vang eina nana shitsanghairala? Hibingli reikhameiya ot china nana theira." ⁵¹Ana ali hānga, "Kachangkhat eina, kachangkhat eina, ina nathumli kahāngna, kazingram shohaida, ithumwui Avāwui kazingraobingna miwui Naomayaratungli kakākā katutung da nathumna theira." ^e e v51 Jishuna Jacobna Bethelli mang kathei (Gen 28:12) chi hāngluishita, chili kazingraobingna shairon eina kazingram kala ngaleiwui ngachaili kakākā katutung sai—ara chi awuili ungshunghairasai.