John 2

2 ¹Kakathumathang Galileewui Canali shakazā akha shokkahaina; chili Jishuwui ava̱ leisai. ²Jishuli kala awui sākhangatha̱binglila shakazāli hokhui. ³Drakhāra̱ kuphaowa tharan, Jishuwui ava̱na ali hānga, "Athumli drakhāra̱ maleimana."

⁴"Sha̱nao, khisāda ili hili thānhaokhala?" da Jishuna ngahānkai. "Iwui atam arui makāranga."

⁵Awui ava̱na raobingli hānga, "Ana nathumli hāngkhami chi saikora sālu."

⁶Chili ngalung tara̱ham tharuk nganinga, Jihudibingwui pheokhamatharwui vang singkahai, ava̱va̱li gallon maga̱ eina thumrā tai zanga. ^a a v6 Tara̱ham ava̱va̱na gallon maga̱ eina thumrā tai (liter hangshinida phangā eina shākhada tharā phangā tai) zanga — hibing ham kahakva̱bing sai.

⁷Jishuna athumli hānga, "Tara̱ham chi tara̱ eina pemngasaklu," chieina athumna akhamong tai pemngasaka. ⁸Ana athumli hānga, "Ara kaikha sokkhuilu, kala phazā akhavāli khuivālu." Chieina athumna sai.

⁹Phazā akhavāna tara̱ drakhāra̱ onkahai chi mazapyangda chi kali eina kharā kaji matheimana; kha tara̱ sokkhuibing china theisi. Chieina ana mākakhāmali hokhui, ¹⁰kala hānga, "Mi kachiva̱na drakhāra̱ kaphā chi rida mira, kala ngasotnaobing marip kahai thili teokhamei chi mira. Kha nana drakhāra̱ kaphā chi aruichang eina tangda singtithaira." ¹¹Jishuna machut khare hi Galileewui Canali sai. Ana awui tekhamatei chi theingasaka, kala awui sākhangatha̱bingna ali shitsanghaowa.

¹²Hiwui thili ana awui ava̱, achināngarā kala sākhangatha̱bingli ngasoda Capernaumli tāhaowa, kala chili zimiksho kateokha apamsanga.

¹³Jihudiwui Makānkhami phanit nganaihairasai tharan, Jishuna Jerusalemli kāhaowa.

Khorumshim Kayāng Tharngasak

¹⁴Khorumshim kayāngli ana mukkā, yao kala nāsha̱ khayorbing chi samphanga, kala lupā kaikhamebing chi tableli pamda leisai. ¹⁵Ana khara̱ eina sajei akha sai, kala yao kala mukkā ngarumda athum saikorali khorumshim kayāngwui eina kashamshokhaowa, lupā kaikhamebingwui pheisā chi heishokhaowa, kala athumwui tablela horkathānmiserhaowa.

¹⁶Nāsha̱ khayorbingli ana hānga, "Hibing hi hipam eina khuithuihaolu! Iwui Avāwui shim chi leihngapha̱ masaalu."

¹⁷Awui sākhangatha̱bingna "Nawui shimwui vang iwui malungkhavātna ili chuira" da kapihaida lei kaji chi phaningunga.

¹⁸Chieina Jihudibingna ngahāna, "Nana hibing sāhaira kaji chiwui vang, ithumli machut khi chitheira?"

¹⁹Jishuna athumli ngahānkai, "Khorumshim hi sākhailu, kala kathumthangwui alungli ina sakāluishitra."

²⁰Chieina athumna ngahānkai, "Khorumshim hi sākā khavai zingkum hangmatida tharuk kāhaira, kala nana kathumthangwui alungli sākāluishitrala?" ²¹Kha ana hāngkahai khorumshim chi awui asāna. ²²Ana kathiwui eina ringshok kahaiwui thili, awui sākhangatha̱bingna ana hi hānga kaji phaningungda, Kathara lairik kala Jishuna hāngkahai tui chi shitsanga.

²³Makānkhami phanit atamli ana Jerusalemli leilakha, mi kachungkhana ana kasā machut kachungkha chi theida awui mingli shitsanghaowa.

²⁴Kha Jishuna athumli khalatta mahorsangmimana, khikhalajila ana mi saikorali thei. ²⁵Miwui pongli khipākhawui shākhi ana mahomana, kaja mi kachiva̱wui wuklungli khi lei kaji ana thei.