Yon maryaj nan Kana

Nan yon maryaj nan Kana, diven an fini, e Jezi san bri fè sis krich dlo pou lave tounen pi bon diven lannwit lan. Apre sa, nan Jerizalèm, li mete machann yo deyò ak yon fwèt, li rele tanp lan kay Papa l, pa yon mache.

Chapit 2.

Twazyèm jou a, te gen yon maryaj nan Kana, nan peyi Galile; manman Jezi te la. Yo te envite Jezi ak disip li yo nan maryaj la tou. Lè diven an fini, manman Jezi di l: “Yo pa gen diven ankò.”

Jezi reponn li: “Madanm, poukisa w'ap antre m nan koze sa a? Lè pa m poko rive.”

Manman l di domestik yo: “Fè tou sa li di nou fè.”

Te gen sis ja wòch pou dlo kanpe la, jwif yo te konn sèvi ak yo pou seremoni netwayaj yo; chak te ka kenbe ven a trant galon. ^a

Jezi di yo: “Plen ja yo ak dlo.” Se konsa yo plen yo ra bouch. Li di yo: “Koulye a, pran ladan l, pote l bay chèf kanbiz la.” Se sa yo fè.

Chèf kanbiz la goute dlo ki te tounen diven an, li pa t konnen kote l te soti — men domestik ki te pran dlo a te konnen. Se konsa li rele nonm ki t'ap marye a sou kote, li di l: “Tout moun sèvi bon diven an anvan, apre sa, lè envite yo fin sou, yo bay sa ki pi mwens bon an. Men ou menm, ou kenbe bon diven an jouk koulye a.” Jezi fè premye mirak sa a nan Kana, nan peyi Galile. Li fè bèl pouvwa li parèt, epi disip li yo kwè nan li.

Apre sa, li desann lavil Kapènawòm ansanm ak manman l, frè l yo ak disip li yo, yo rete la kèk jou.

Lè fèt Delivrans jwif yo te prèt pou rive, Jezi moute lavil Jerizalèm.

Jezi netwaye lakou tanp lan

Nan lakou tanp lan, li jwenn moun ki t'ap vann bèf, mouton ak pijon, ak lòt moun ki te chita dèyè tab ap chanje lajan. Li fè yon fwèt ak kòd, li mete yo tout deyò nan lakou tanp lan, ni mouton ni bèf; li gaye tout lajan moun ki t'ap chanje lajan yo, li chavire tab yo.

Li di moun ki t'ap vann pijon yo: “Wete sa yo isit la! Pa fè kay Papa mwen an tounen yon mache.”

Disip li yo vin chonje sa ki te ekri a: “Lanmou mwen gen pou kay ou a ap devore m.”

Lè sa a, jwif yo mande l: “Ki mirak ou ka fè nou wè ki pou moutre ou gen dwa fè bagay sa yo?”

Jezi reponn yo: “Kraze tanp sa a, nan twa jou m'a rebati l.”

Yo reponn li: “Yo pran karannsizan pou yo bati tanp sa a, epi ou menm ou pral rebati l nan twa jou?” Men, tanp Jezi t'ap pale a, se te kò li. Apre li te leve soti vivan nan lanmò, disip li yo vin chonje li te di sa, epi yo kwè nan sa ki ekri nan Liv la ak nan pawòl Jezi te di a.

Pandan li te lavil Jerizalèm pou fèt Delivrans lan, anpil moun wè mirak li t'ap fè yo, yo mete konfyans yo nan non li.

Men, Jezi pa t fè yo konfyans, paske li te konnen tout moun. Li pa t bezwen pèsonn vin di l anyen sou moun, paske li te konnen sa ki nan kè chak moun.