Cana bi Tazwan Bahwan
Galilee taram Cana bi tazwan bahwan khat bi drakha tui loi swaknu kaan bi, Jisu na inthim toga sizinnu lung tui ngam karuk ding ha ni om kasinnu drakha tui to swake. Atiga Jerusalem bi Maanna rang khatna zwannu nun ding lat thou thangluga, to bathiangnu in ding Apa in diga kouluga, langgonnu in to mako diga rinne.
2 1Ni thiraang bi, Galilee taram Cana bi tazwan bahwan khat to ngaake; Jisu om banu habei ga ong ngaake. 2Jisu le Baom potroi rwan le tazwan bahwan om balou bi talot thang ngaake. 3Drakha tui loi swaknu kaan bi, Jisu om banu na Bakhou rinne, “Bani khou drakha tui am make.”
4Jisu na bakhou rinne, “Mannu, pa-aam lang nangna Ating hei lang bi kai khutnubo? Aom bakaan nai hung make.”
5Banu na baswak rwan khou rinne, “Maanna nani khou rinnu danga nanina towo.”
6Habei ga Jihudi rwan om to bathiangnu langna sizinnu lung tui ngam karuk am ngaake, ngam khat khat gana tui gallon somni khouna somthum khak lousu ngamme. a a v6 Ngam khat khat gana tui gallon somni khouna somthum khak (liter 75 khouna 115 khak) lousu ngamme—hei bing ga ngam lian bing ngaake.
7Jisu na bani khou rinne, “Ngam bing ding tuina sip thang ngo.” Atiga banina ngam om bapa tang basaan sip thang rwe. 8Maanna bani khou rinne, “Atun titcha laa swakluga, balou balu tonu khou lwang hungro.” Atiga banina haga to rwe.
9Balou balu tonu na drakha tui ding gonnu tui ga batem thang rwe, atiyeda haga tatoga hungnu maanna theinu make—tui laa thangnu baswak rwan na gabe theiye. Atiga maanna tazwanpa ding kalwang swakluga kou rwe, 10atiga rinne, “Mi bing gana drakha tui sanu ga ba be in lang pi nge, atiga talot mi nun kalonu kaan bi kasinnu ding in lang pi nge. Atiyeda nangna drakha tui sanu ga atun basaan ong thang rwe.” 11Jisu na Galilee taram Cana bi hei ba be om badannu chwan to rwe. Maanna Bachakrin pi thin thangluga, Baom potroi rwan na Bating balumsa rwe.
12Hei nung bi Maan Banu, Banao rwan khatle Baom potroi rwan le diga Capernaum bi ta rwe, atiga habei ga ni titcha ong rwe.
13Jihudi rwan om Takan Swaknu Balou nai hungnu kaan bi, Jisu Jerusalem la ka rwe.
Kalum In Ding Bathiang Thangnu
14Kalum in bi Maanna ken, zao khatle banphi zwannu mi nun, khatle sian kachoi kainu table bi badung ongnu nun ding mu rwe. 15Maanna rui gana bwei lang khat seluga, zao le ken le brumza ding kalum in bina kazun sat rwe, atiga sian kachoi kainu om sian ding bazwan satluga bani om table bing tun kalat sat rwe.
16Banphi zwannu nun khou Maanna rinne, “Hei bing ding abeiya bina lou swakro! Apa om in ding keithian ka to mako.”
17Baom potroi rwan na, “Nang om in lang sung khutnuna Pi braanlune,” diga ri thang ongnu ga baningsu rwe.
18Atiga Jihudi rwan na Bakhou ngaiye, “Hei bing to lang bina Nangna ani khou pa-aam badannu chwan pi mu thang dingbo?”
19Jisu na bani khou rinne, “Hei kalum in ding to braan sat ngo, atiga ni thiraang bi Eina pi ring thou thanglune.”
20Banina rinne, “Hei kalum in ding sangwan sombali karuk bi be to ngaake, atiyeda Nangna ni thiraang bi pi ring thou thang dingbo?” 21Atiyeda Maanna rin thangnu hei kalum in ga Bapum ngaake. 22Maan thinu bina ring thou latnu kaan bi, Baom potroi rwan na Maanna hei rin thangnu ga baningsuluga, ri thang ongnu Chong khatle Jisu na rin thangnu chong ding balumsa rwe.
23Takan Swaknu Balou kaan bi Maan Jerusalem bi ongnu danga, Maanna to damnu badannu chwan bing ding mi taswang khakna muluga, Bameng ding balumsa rwe.
24Atiyeda Jisu na bani khou Bapum ding bachoi thang mak ngaake, balangbe Maanna mi bing ding theiye. 25Maanna mi nun om lang bi pakhatcha om sake ding hak mak ngaake—balangbe mi pakhat khat om sung bi pa-aam ongme dinu Maanna theiye.