Kana ka Leiyetbü
Kana kabü leiyetan lema ih wankei, hoba Jisuei huphanga saüenbü deithung lak lo kho nangnakbü maiboutham ih la yeikei. Kheijinei Jerusalema haoei yaakbou shuong to ngümei sattikei, hoba kishang kho yaakshang aying, lausikei jembü Bou chem ki dogo laukei.
2 1Sembounyet, Galil kabü Kana sangnyua leiyetan lem longkei; Jisueibü nyu khünei kikei. 2Jisu hoba haoeibü eikshuong tokei leiyetan lem to ngabü kikei. 3Ih wanjinei, Jisueibü nyuei hao to laukei, “Haoen la ih aying.”
4“Yaksanyu, aila no ngo ho ngüha sungbada?” Jisuei jongaikei, “Kü jihsiphai molouko kikei.”
5Haonyuei sambü shuong to laukei, “Haoei kan to ai lenlaje, kho khei kümjan.”
6Khünei laangei kümbü deithung lak lokei, Jihudabü saüenbü shanga jungbü, deithung weko gelon saoche ka khujin sühko atbü. a a v6 Deithung weko gelon saoche ka khujin aoyou atkei (liter 75 ka 115)—habü shuong thung yaangbü kikei.
7Jisuei haoen to laukei, “Deithung to dei shentiashi,” kheijinei haoenei sembung sühko shentikei. 8Haoei haoen to lenkei, “Tou lalok khulashi, hoba kho shaubüyungbü leibou to kuashi.” Kheijinei haoenei kho tegü kümbei.
9Shaubüyungbü leibouei dei ih la yeibü kho jepan chühkei, hoba kho aoka loubü haoei angekei—lausikei dei khulabü sambü shuongei ngekei. Kheijinei haoei chemkanbou ngaan ngakei, 10hoba laukei, “Aoyou wekoei shaangla maibü ih phoda, hoba yensi shuong jaakan phaia hanbü ih phoda. Lausikei nyi maibü ih kho ho jiha sühko sungbaa.” 11Jisuei ho shaangbü amaaphilabü Galil kabü Kana sangnyua kümbei. Haoei jembü soneikangbü tang khittikei, hoba haoeibü eikshuongei hao to mailembei.
12Kho phaia hao jembü nyu, jaisinasi shuong, hoba eikshuong yoa Kapernaum to louyenkei, hoba khünei chalou shisho ong thüngkei.
13Jihudabü Püetbü Lem nyangko loujinei, Jisu Jerusalem to angkei.
Lembüchem Khongaen Hinseitibü
14Lembüchem khonga haoei masu, sanlon, hoba dukutuk yaakbü shuong, hoba nam jeiyobü shuong khümsoka setan kibü hapbei. 15Haoei janglühei lü che kümbei, hoba haoen pendou, sanlon hoba masu liko, Lembüchem khonga ka shian sattikei, hoba nam jeiyobü shuongeibü chandinam koukei, hoba haoeneibü khümsok shuong sungbuan apbei.
16Dukutuk yaakbü shuong to haoei laukei, “Habü shuong hanei apyoashi! Kü Bou chem kho jekyaakshang akümjan.”
17Haoeibü eikshuongei Laishibaei, “Kaibü chem shanga maangdakei ngo juoklabü,” dogo dobü kho damenkei.
18Kheijinei Jihudabüei phekei, “Nyi habü kümsilei kümbü shanga, ai amaaphilabü kün la lenlabü?”
19Jisuei haoen to jongaikei, “Ho Lembüchem kho leiluashi, hoba ngei chalou semnyeta kho langngailabü.”
20Haoenei jongaikei, “Ho Lembüchem kho dangla po saonyi to lak kikei, hoba nyi chalou semnyeta kho langngailabü lo?” 21Lausikei haoei laubü Lembüchem kho jembü mang kikei. 22Hao haibü ka langngaian phaia, haoeibü eikshuongei haoei ho laubü kho damenkei, hoba Laishiba hoba Jisuei laubü ngüh to mailembei.
23Püetbü Lema hao Jerusalema kijinei, juongei haoei kümbü amaaphilabü shuong hapbei, hoba hao nyena mailembei.
24Lausikei Jisuei himshuong kho haoen to amaanglembei, aishanga haoei müt pendou to ngekei. 25Haoei müt shangabü aoeibü aukabü akhambei, aishanga haoei müt weko maanga ai kibü ngekei.
