Khalatlui 32

32 ¹O kazingram, khanganālu, kala ina matuira; kala okathuina iwui khamorwui tui shāranu. ²Iwui tamkachithei zingrot thāda katāranu, iwui tui ikra̱ thāda katāranu, khanima zingrotna khawonao tungli thāda, kala thingnā haksangbing tungli zingrot thāda. ³Kaja ina ithumwui Avāwui ming hāngchitheira; ithumwui Avāli hakkhamahā mikharān milu! ⁴Lunghār, ithumwui Avā, awui otsak kākashungna, kaja awui shongfa saikora khamashungna. Ithumwui Avā chisin kahaina kala khangui masāmana; khamashunga kala khangatara ale. ⁵Athumna khamakhao otsak sāhaira; athum awui naomayara ngarā maningluimara, kha achukna, kha̱khamakhei kala khayeikazam thotna. ⁶Hi thāda nathumna ithumwui Avāli tandi khala, O mangma̱ kala mathangkhamei mibing? Ana nathumwui Avā maningmala, nali kasaa, nali sākhuilaga sakāmi kaje? ^a a v6 Hili laana chi mashunglak eina hānga: ithumwui Avā chi Israelli kasaa, athumli sākhuilaga sakāmi kaje—hi ana atam kachida awui naomayara ngarāli khipā sāda leikahaiwui khamā china. ⁷Achālakhawui zimiksho phaningunglu; thot-thot kachiwui zingkum machukyanglu. Nashāvāli ngahānlu, chieina ana nali hāngra, nawui khararnaobingli, chieina athumna meichitheira. ⁸Juikhamataina, ithumwui Avāna, yurbingli athumwui shimlui mi tharan, ana mikumo ngayarkhai tharan, Israelwui naomayarabingwui mashing athishurda ana mibingwui thari shommi. ⁹Kaja ithumwui Avāwui yar chi awui mina, Jacob chi awui shimluikatna. ¹⁰Ana ali siwuk ngaleili samphanga, lamhāngwui kakhonga ramcholi; ana ali kuinama, ana ali khuipama, ana ali awui mikwui yangkhangai akha ngasāda phārihaowa. ¹¹Khalāngna awui athip ngaphaokai thāda, awui naonaobing tungli yongzatta thāda, ana awui angachāng kasangda athumli khuiya, awui angachāng tongli athumli vamzatta. ¹²Ithumwui Avā amāngna ali ngakuizata, kala ali ngayurpamda makathei vare maleimana. ¹³Ana ali ngaleiwui kajuibing tungli haira, kala ana luiwui samkaphang shai; ana ali lunghārwui eina khuira̱ eina phāzāngasaka, kala meizai lungkaiwui eina thao mi. ¹⁴Seiwui makhan kala yaoshangwui seina̱, yaonaobingwui athao eina, Bashanwui yaovā kala mebing, kala kehu phameikap kaje eina phāzāngasaka. Nana drakhātheiwui shee amalao kakā drakhāra̱ manga. ¹⁵Kha Jeshurun nganaiyokhaida ngachaka; nana nganaiyokhaira, pangsiririda, kala tāngpat nganaiyokhaira; chieina ana ali kasaa ithumwui Avāli horhaowa, kala awui huikhamiwui lunghār chili ningkachaihaowa. ^b b v15 Jeshurun hi Israelwui vang laali hāngkahai mingna, chiwui alung hi "khangatara akha" da mashunga. ¹⁶Makathei varebing eina athumna ali yuikashi mathuk ngasaka; ningkakachai ot sāda athumna ali malung thuingasaka. ¹⁷Athumna Vare maninglakha kameobingli pha̱phayai, athumna matheikasa varebingli, vare kadharbing, aya-achonthangmāng rāchithei kahai, nashāvā ngarāna mangacheekasabing. ¹⁸Nali avāva̱ lunghārli nana horhaowa, kala nali pharāa ithumwui Avā chi nana malaihaowa. ¹⁹Awui naomayarabing kala naongalāva̱bingwui khareowui vang, ithumwui Avāna chi theilaga athumli horshokhaowa.

²⁰Kala ana hānga, "Iwui mai athumwui eina thummihaora; athumwui atam khi ngasārakhala ina yangra, kaja athum khamakhao thotna, alungli ningkatong maleia naongarābingna.

²¹"Athumna Vare maningsi kahai eina ili yuikashi ngasaka; athumwui arema meoma̱ eina ili malung thuingasaka. Chieina ina mi maningsi kahai eina athumli yuikashi ngasakra; mangkhama̱ yur eina athumli malung thuingasakra. ²²Kaja iwui malungkhavātna mei sākāhaira, chi Kazeiram kathukali eina tangda chuira; china okathui kala chiwui theishirai chuitāra, kala kaphungwui shimphungabingli meiwonna chuitāra. ²³Athumwuitungli kalākashi parkahaira; iwui malāthing saikora athumwuitungli kāpserhaira. ²⁴Kakhumna sāshimān ngasakra, kachui kazātkashi kala thingkhā sākashimānna shaingakanhaora; chifali ngawokazata yurbingwui hu eina ina athumwuitungli sāyurbingwui ahā chihovāra. ²⁵Yaronnao kala ngalānao ngarumda, na̱ mangda khalei naoshinao sam charshi khararnao ngarumda, ayarli raighaina sāthatra, kala alungli khangacheena sāshimānra. ²⁶Ina hānglaipai, 'Athumli amarimrim sātāra; miwui ngachaili eina athumwui ningphun khuishokhaora,' ²⁷Yangkashewui mana̱shili ina ngachee maningmasi kaje, athumwui yangkashebingna mabhaptāda hāngpaishina, 'Ithumwui pāng khalattana yuihaira; hi saikora Varena sākahai maningmana.' ²⁸Kaja athum thangkhamei maleia yurna, kala athumwuili theishingkakhui maleimana. ²⁹Athumna thangmeisi kaje, hi chi athumna bhap tārapai; athumwui khanaowa kalākashi athumna theira. ³⁰Mi akhana kathada 1,000 kashampaira̱khala, kala mi khanina 10,000 yāmngasakpaira̱khala, athumwui lunghārna athumli yorsang maningsi kaje, kala ithumwui Avāna athumli mai maningsi kaje? ³¹Kaja athumwui lunghār hi ithumwui lunghār thāda maningmana; ithumwui yangkashebingna tangda chi khuisangra. ³²Kaja athumwui drakhārong hi Sodomwui drakhārong kala Gomorrahwui luibingwui eina kharāna; athumwui drakhāthei hi huwui drakhātheina, athumwui mazānbing thingkhāna. ³³Athumwui drakhāra̱ hi phara̱wui huna, phara̱wui sāshilak huna.

³⁴"Hi iwuili kaziphaida, iwui kazipshim alungli seali kahai maningmala? ³⁵Athumwui phei nganaithui atam chiwui vang, athut kala tandi mi hi iwuina; kaja athumwui unshimui zimik nganaihaira, kala athumwui kashimān china athumtungli nganaimeihaira. ³⁶Kaja athumwui yāng vānhaira, kala raonao lah ningkhān kahai akhala mataimana kaji chi ana theiakha, ithumwui Avāna awui raobingli lumashanmira kala awui mibingli athut khuimira. ³⁷Chiwui thili ana hāngra, 'Athumwui varebing kali leikhala, athumna ngayinkhui kaji lunghār chi, ³⁸Athumwui pha̱kaphayāwui athao kazā kala athumwui phamang chigatwui zam kamang china? Athum ngakarthuida nathumli ngachonranu; athum nathumwui ngayin khavai ngasāranu!' ³⁹Yanglu, I khalatta a laka, kala I maningla vare katei maleimana. Ina thi ngasak kala ina kharing mi; ina khamā za̱ngasak kala ina raimi, kala khipākhana ipāng eina kanshok masārarmara. ⁴⁰Kaja ina ipāng kazingramli yangkāda hāngra: Ina katang mavaila ringa kaji chi kachangkhata thāda, ⁴¹Ina iwui phikphik kahai raighai kharā tharan kala ipāngna bichar phung tharan, iwui yangkashebingli athut khuimira kala ili yangkakharing kasābingli tandi mira. ⁴²Kathi khaleibing kala narkahaibingwui ashee eina ina iwui malāthing khamarip ngasakra, kala yangkashewui sam katāva̱ kabingwui kui eina iwui raighaina asā tukshaira."

⁴³He yurbing, awui mibingli ngasoda mathānlu, kaja ana awui naongarāwui ashee athut khuimira kala awui yangkashebingli athut khuimira; ana awui ngalei kala awui mibingwui vang pheomira.

⁴⁴Moses kala Nunwui naomayara Joshuana laa hiwui tui saikora chi mibingli hānga. ⁴⁵Kala Mosesna Israel saikorali tui saikora hi hāngkup kahaiwui thili,

⁴⁶ana athumli hānga, "Ina aja nathumli shākhi kasā tui saikora hi nathumwui ningli hailu, chieina nathumna nathumwui naongarāli ain hiwui tui saikora chi mayonda sā khavai ningmira. ⁴⁷Hi nathumwui vang arema tui maningmana; hi nathumwui kharingna. Tui hiwui mangā eina nathumna Jordan kankāda shimlui khuiki kaji ngaleili kharamda ringra."

Ithumwui Avāna Mosesli Shimli Hoklui

⁴⁸Chithang ithumwui Avāna Mosesli hānga,

⁴⁹"Jericholi kāroda Moabli khalei Abarim phungrei hi, Nebo Kaphungli kālu, kala ina Israelwui mibingli shimlui sākhavai miki kaji Canaanli ara̱yangkhuilu. ⁵⁰Chiwui thili, nagato Aaronna Hor Kaphungli thida awo ayiwuili khuiunga thāda, nana kāki kaji kaphungli thihaolu, kala nawo nayiwuili khuiunghaora, ⁵¹Kaja nana Zin lamhāngli khalei Meribath-kadeshwui tara̱li, Israelwui mibingwui ngachaili ili shitkasang maleilakla sai, kaja nana Israelwui mibingwui ngachaili ili kathara thāda maseilakmana. ⁵²Kaja ina Israelwui mibingli khami ngalei chi nana katāva̱li theira, kha chili mazangmara."