Khalatlui 31

31 ¹Chieina Mosesna vālaga Israel saikorali tui hi hānga. ²Ana athumli hānga, "Aja zimiksho iwui zingkum shākha maga̱ kāhairasai; ina shok kala zang masāluimara, kala ithumwui Avāna ili hānga, 'Nana Jordan hi makānpaimara.' ³Nathumwui Avā khalattana nathumli rida kānkāra; ana nathumwui mangāli yur hibing sāshimānra, kala nathumna athumli kashamshokra. Ithumwui Avāna hāngkahai athishurda, Joshuana nathumli rida kānkāra. ⁴Amorwui awungabing Sihon kala Og kala athumwui ngaleili sāshimān tharan sākahai athishurda, ithumwui Avāna athumlila sāra. ⁵Ithumwui Avāna athumli nathumwui pāngli mira, kala ina nathumli kaso kahai tākam eina, nathumna athumli sāphalungra. ⁶Pingmeida malung zangmeilu. Athumli mangacheealu, lah makhangachāalu, kaja nathumwui Avāna nathumli ngasomira; ana nathumli khipākha mahorhaimara, lah horchao kahai masāmara."

⁷Mosesna Joshuali hokhuilaga Israel saikorawui mangāli ali hānga, "Pingmeida malung zangmeilu; nana mibing hili ngasoda, ithumwui Avāna athumwui avāva̱ ngarāli mira da ngashit kahai ngalei chili zangra, kala nana chi athumwui shimlui thāda khuingasakra. ⁸Ithumwui Avā khalattana nathumli rida vai; ana nathumli ngasomira. Ana nathumli khipākha mahorhaimara, lah horchao kahai masāmara. Mangacheealu; malung maringalu."

Israelli Misang Kahai Ain

⁹Mosesna ain hi kapisanga, kala ithumwui Avāwui tuingashitwui oko kazanga pāngmonbing, Leviwui naomayarabingli, kala Israel saikorawui khararnaobingli mi. ¹⁰Chieina Mosesna athumli kasoi: "Zingkum kashine kapei atam kajida, yangmi kumwui atam chitharan, chumpha̱ phanitlungli, ^a a v10 Chumpha̱ phanit: hi zimiksho shinithang sāmi heiun surwui zātkhān akhana; chili shimkhurbingna rāmrah sākhuilaga apamda, Israelwui lamhāngwui kharin chi phaningung khavaina. ¹¹Israel saikora nathumwui Avāwui mangāli, ana kapangkhuiki kaji apam chili rā chitharan, ain hi Israel saikorali tharlak eina pālu. ¹²Nathumwui Avāli shākhui khavai, tamkhui khavai, kala khangachee khavai, kala ain hiwui tui saikora chi mayonda sā khavai, mayarnaobing, sha̱naobing, naoshinaobing, kala nathumwui keinungbingli ngasokhara khangatei, mi katonga kazipkhuilu. ¹³Chieina ain hi mathei athumwui naongarāna chi shākhuida, nathumna shimlui khuikhavai Jordan kankāda kaji ngaleili apamlakha eina tangda, nathumwui Avāli khangachee khavai tamkhuira."

Ithumwui Avāna Joshuali Otsin Chisinmi

¹⁴Ithumwui Avāna Mosesli hānga, "Nawui kathi atam nganaihairasai. Joshuali hokhuilu, kala kazip khavai kachonshimli nganing ngasaklu; ina ali otsin chisinra." Chieina Moses kala Joshuana vālaga kazip khavai kachonshimli nganing ngasaka.

¹⁵Chieina ithumwui Avāna muiyā pakra̱li kachonshimli rāchithei, kala muiyā pakra̱ chi kachonshim khāmongpheili nganinga. ¹⁶Kala ithumwui Avāna Mosesli hānga, "Na navā ngarāli ngasoda shirenphalungra; chiwui thili mibing hina ngakarthuida, athum kazanga kaji ngaleiwui khangatei varebingli thishurda khayorwui otsak sāra; athumna ili horhaida, ina athumli sākahai tuingashit chi sākhaira. ¹⁷Chithang ngalāngda ina athumwuitungli malungvātra; ina athumli horhailaga, imai athumwui eina ngathumhaira, kala athum shaihaora. Makaphā kala kakhanang kachungkha athumwuitungli rāra. Chithang ngalāngda athumna hāngra, 'Ithumwui Vare ithumli ngasomana chiwui vang eina makaphā hibing ithumwuitungli rā maningmala?' ¹⁸Chithang, khangatei varebingli horsangda athumna sākahai makaphā saikorawui vang, ina kachangkhata imai ngathumserhaira.

¹⁹Ara laa hi nathumwui vang kapilu, kala chi Israelnaobingli tamchitheimilu, athumwui maleli haimilu, chithākha laa hi Israelnaobingli makhamayawui iwui shākhi ngasāra. ²⁰Ina athumwui avāva̱ ngarāli ngashit kahai, seina̱ eina khuira̱ khalong ngalei chili athumli thānkazang tharan, athumna zāda pemhaida nganaipat ngasāra; chieina khangatei varebingli horsangda otram ngatha̱laga, athumna ili ningkachaida iwui tuingashit sātekra. ²¹Kalākashi kachungkha kala kakhanang kachungkhana athumli ngaphankhui tharan, laa hi shākhi thāda athumli rāngararra, kaja chi athumwui ara̱-azāwui maleli eina malaihaimara. Kaja ina athumli mira da ngashit kahai ngaleili mathānzangrangsai, aja athumwui khangarān chi ina thei."

²²Chieina Mosesna chithang ngalāngda laa hi kapilaga, chi Israelnaobingli tamchithei.

²³Chieina ithumwui Avāna Nunwui naomayara Joshuali ot chisina, hānga: "Pingmeida malung zangmeilu; nana Israelnaobingli mira da ina ngashit kahai ngaleili thānzangra, kala iya naning leira."

²⁴Mosesna ainwui tuibing hi lairikli, khare eina thuida khanao eina tangda, kapida kupkahaiwui thili, ²⁵ana ithumwui Avāwui tuingashitwui oko chi zangkhavai Levinaobingli kasoi, ²⁶"Ainwui lairik hi khuida, nathumwui Avāwui tuingashitwui oko chiwui khaleipamli haimilu, apam chili nathumli makhamayawui shākhi ngasāda leichingra. ²⁷Kaja nathumwui ngakaikashi kala ngakaishitingting kahai ina thei. Aja ina naning kharing eina leilakha, nathumna ithumwui Avāli ngakaikashina; iwui kathiwui thili chi kayākha lāngmeida ngakaira! ²⁸Nathumwui shangbingwui khararnaobing kala otva̱bing saikora iwuili rākazipmilu, chithākha ina tuibing hi athumli hāngmira, kala ina kazingram eina ngalei chili athumli makhamayawui shākhi khavai hora. ²⁹Kaja iwui kathiwui thili nathum khamakhao ngasakserhaira, ina nathumli kaso kahai shongfawui eina ngareithuida kaji ina thei. Kala kapinga atamli, nathumna ithumwui Avāwui mangāli makhayā ot sāda, nathumwui pāng otsak eina ali malungvāt khangasakwui vang, kalākashi nathumwuitungli rātāra."

³⁰Mosesna laa hiwui tuibing chi khare eina thuida khanao eina tangda, Israelwui yarui kazip saikorali hāngchithei.