Okwu Ikpeazụ Mosis

Mgbe Mosis dị narị afọ na iri abụọ, o nyefere ọrụ ahụ: Nna anyị na-ebu unu ụzọ, ọ gaghị ahapụ unu ma ọlị, Jọshụa ga-edu unu. E dere iwu ahụ, ka a na-agụ ya nʼolu dara ụda nʼafọ asaa ọ bụla nye onye ọ bụla, gụnyere ụmụaka. A kụziri otu abụ, nʼihi na ọ maara na ha ga-atụgharị.

Isi 31.

Mgbe ahụ, Mosis gara gwa Izrel niile okwu ndị a. Ọ gwara ha sị, “Taa, agbaala m narị afọ na iri afọ abụọ; apụghịkwa m ịpụ apụ na ịbata abata, Nna anyị agwakwala m, sị, ‘Ị gaghị agafe Jọdan a.’ Nna unu nʼonwe ya ga-ebu unu ụzọ gafee; ọ ga-ebibi mba ndị a nʼihu unu, unu ga-achụpụkwa ha. Joshua ga-ebu unu ụzọ gafee, dịka Nna anyị kwuru. Nna anyị ga-emeso ha dịka o mesoro Saịhọn na Ọg, ndị eze ndị Amọ, na ala ha, mgbe o bibiri ha. Nna anyị ga-enyefe ha nʼaka unu, unu ga-emesokwa ha kpọmkwem dịka m nyere unu nʼiwu. Dịnụ ike, nweenụ obi ike. Atụkwala ha egwu, ka obi gharakwa ịlọ unu mmiri nʼihi ha, nʼihi na Nna unu na-eso unu aga; ọ gaghị ahapụ unu, ọ gaghịkwa agbakụta unu azụ.”

Mosis kpọrọ Joshua gwa ya okwu nʼihu Izrel niile sị, “Dịrị ike, nwee obi ike—gị na ndị a ga-abanye nʼala Nna anyị ṅụrụ nna nna ha iyi inye ha, ị ga-ekenyekwa ha ya dịka ihe nketa ha. Nna anyị nʼonwe ya na-ebu gị ụzọ; ya na gị ga-anọ. Ọ gaghị ahapụ gị, ọ gaghịkwa agbakụta gị azụ. Atụla egwu; ekwela ka obi daa gị mba.”

Iwu ahụ E Nyefere Izrel

Mosis dere iwu a nye ya ndị nchụaja, ụmụ Livaị, bụ ndị na-ebu igbe ọgbụgba ndụ Nna anyị, nyekwa ndị okenye niile nke Izrel. Mgbe ahụ, Mosis nyere ha iwu sị, “Na njedebe nke afọ asaa ọbụla, nʼoge a kara aka nke afọ mgbaghara ụgwọ, nʼoge Mmemme Ụlọ Ikwuu, ^a mgbe Izrel niile bịara nʼihu Nna unu nʼebe ọ ga-ahọrọ, gụpụtaaranụ Izrel niile iwu a nʼoke olu. Chịkọtaanụ ndị mmadụ—ụmụ nwoke, ụmụ nwanyị, ụmụaka, na ndị ọbịa bi nʼobodo unu—ka ha nụ, mụta, tụọkwa Nna unu egwu, debe ma mee okwu niile nke iwu a. Mgbe ahụ, ụmụ ha, bụ ndị na-amaghị iwu a, ga-anụ ya mụta ịtụ Nna unu egwu ụbọchị niile unu ga-ebi nʼala unu na-agafe Jọdan inweta.”

Nna anyị Nyere Joshua Ọrụ

Nna anyị gwara Mosis sị, “Ọnwụ gị adịla nso. Kpọọ Joshua, bịanụ guzo nʼụlọ ikwu nzukọ; m ga-enye ya ọrụ.” Ya mere, Mosis na Joshua gara guzo nʼụlọ ikwu nzukọ.

Mgbe ahụ, Nna anyị pụtara nʼụlọ ikwu ahụ nʼime ogidi igwe ojii, ogidi igwe ojii ahụ guzokwa nʼọnụ ụzọ ụlọ ikwu ahụ. Nna anyị gwara Mosis sị, “Lee, ị na-aga idina nʼebe nna nna gị nọ. Ndị a ga-ebili kwaa iko soro chi ala ọzọ nke ala ha na-abanye, ha ga-agbakụta m azụ, mebie ọgbụgba ndụ mụ na ha gbara. Nʼụbọchị ahụ, iwe m ga-adị ọkụ megide ha. M ga-agbahapụ ha, zoo ha ihu m, a ga-erichapụkwa ha. Ọtụtụ ọdachi na nsogbu ga-abịakwasị ha. Nʼụbọchị ahụ, ha ga-asị, ‘Ọ bụ na ọdachi ndị a abịakwasịghị anyị nʼihi na Chineke anyị anọnyeghị anyị?’ Nʼezie, m ga-ezo ihu m nʼụbọchị ahụ, nʼihi ihe ọjọọ niile ha mere, na-echigharakwuru chi ndị ọzọ.

Ugbu a, deeranụ onwe unu abụ a, kuziere ya ụmụ Izrel, tinye ya nʼọnụ ha, ka abụ a wee bụrụ àmà m megide ụmụ Izrel. Mgbe m ga-akpọbata ha nʼala mmiri ara ehi na mmanụ aṅụ na-eru na ya, bụ nke m ṅụụrụ nna nna ha nʼiyi, ha ga-eri, rijuo afọ, buo ibu, chigharikwuru chi ndị ọzọ fee ha, leda m anya, mebie ọgbụgba ndụ m. Mgbe ọtụtụ ọdachi na nsogbu ga-abịakwasị ha, abụ a ga-eguzogide ha dịka àmà, nʼihi na a gaghị echefu ya nʼọnụ ụmụ ụmụ ha. Nʼihi na amaara m ihe ha na-eche nʼobi taa, tupu m akpọbata ha nʼala ahụ m ṅụrụ iyi inye ha.”

Ya mere, Mosis deturu abụ a nʼotu ụbọchị ahụ, kuziekwara ya ụmụ Izrel.

Mgbe ahụ, Nna anyị nyere Joshua nwa Nun ọrụ sị, “Dịrị ike, nwee obi ike—ị ga-akpọbata ụmụ Izrel nʼala ahụ m ṅụrụ iyi inye ha, mụ onwe m ga-anọnyekwara gị.”

Mgbe Mosis dechara okwu niile nke iwu a nʼakwụkwọ, site na mmalite ruo ọgwụgwụ, o nyere ndị Livaị na-ebu igbe ọgbụgba ndụ Nna anyị iwu sị, “Werenụ Akwụkwọ Iwu a, debe ya nʼakụkụ igbe ọgbụgba ndụ Nna unu, ka ọ nọdụ nʼebe ahụ dịka àmà megide unu. Nʼihi na amaara m nnupụisi unu na isi ike unu. Ọbụladị ugbu a, mgbe mụ na unu dị ndụ taa, unu enupụla isi megide Nna anyị—ọ ga-esikwa aṅaa dịrị mgbe m nwụsịrị! Chịkọtaranụ m ndị okenye niile nke ebo unu na ndị ọchịagha unu, ka m gwa ha okwu ndị a, kpọkwaa eluigwe na ụwa ka ha gbaa àmà megide ha. Nʼihi na amaara m na mgbe m nwụsịrị, unu ga-emebi emebi kpamkpam, si nʼụzọ m nyere unu nʼiwu wezuga onwe unu. Nʼụbọchị ndị na-abịa, ọdachi ga-adakwasị unu, nʼihi na unu ga-eme ihe ọjọọ nʼanya Nna anyị, na-akpasu ya iwe site nʼọrụ aka unu.”

Mosis gụpụtara okwu niile nke abụ a, site na mmalite ruo ọgwụgwụ, nʼihu ọgbakọ Izrel niile.