ዘዳግም 31

31 ¹ሙሴም ሄዶ እነዚህን ቃሎች ለእስራኤል ሁሉ ተናገረ። ²እንዲህም አላቸው፤ “ዛሬ 120 ዓመት ሆኖኛል፤ ከእንግዲህ ወዲያ መውጣትና መግባት አልችልም፤ አባታችንም፣ ‘ይህን ዮርዳኖስ አትሻገርም’ ብሎኛል። ³አባታችሁ ራሱ በፊታችሁ ይሻገራል፤ እነዚህንም ሕዝቦች ከፊታችሁ ያጠፋል፤ እናንተም ታወጧቸዋላችሁ። ኢያሱ፣ አባታችን እንደ ተናገረ፣ በፊታችሁ ይሻገራል። ⁴አባታችን በአሞራውያን ነገሥታት በሴዎንና በዐግ፣ እንዲሁም በምድራቸው ባጠፋቸው ጊዜ እንዳደረገ፣ እነርሱንም እንዲሁ ያደርግባቸዋል። ⁵አባታችን አሳልፎ ይሰጣችኋል፤ እኔም እንዳዘዝኋችሁ በትክክል ልታደርጉባቸው ይገባል። ⁶ጠንክሩ፤ ደፋርም ሁኑ። አትፍሩአቸው፤ አትደንግጡባቸውም፤ ምክንያቱም አባታችሁ ከእናንተ ጋራ ይሄዳልና፤ ከቶ አይተዋችሁም፤ አይጥላችሁምም።”

⁷ሙሴም ኢያሱን ጠርቶ በእስራኤል ሁሉ ፊት እንዲህ አለው፤ “ጠንክር፤ ደፋርም ሁን፤ ምክንያቱም አባታችን ለአባቶቻቸው ሊሰጣቸው ወደ ማለላቸው ምድር ከዚህ ሕዝብ ጋራ ትገባለህ፤ አንተም ርስት እንዲሆናቸው ታካፍላቸዋለህ። ⁸አባታችን ራሱ በፊትህ ይሄዳል፤ ከአንተም ጋራ ይሆናል። ከቶ አይተውህም፤ አይጥልህምም። አትፍራ፤ ተስፋም አትቍረጥ።”

ለእስራኤል በአደራ የተሰጠ ሕግ

⁹ሙሴም ይህን ሕግ ጽፎ የአባታችንን የኪዳን ታቦት ለሚሸከሙት ለሌዊ ልጆች ለካህናት፣ ለእስራኤልም ሽማግሌዎች ሁሉ ሰጠ። ¹⁰ሙሴም እንዲህ ብሎ አዘዛቸው፤ “በየሰባት ዓመቱ መጨረሻ፣ በዕዳ ስረዛ ዓመት በተወሰነው ጊዜ፣ በዳስ በዓል ወቅት፣ ^a a v10 የዳስ በዓል፦ ቤተ ሰቦች የእስራኤልን የምድረ በዳ ጒዞ ለማስታወስ ጊዜያዊ ዳሶችን ሠርተው ይኖሩበት የነበረ፣ በመከር ወቅት የሚከበር የሳምንት በዓል። ¹¹እስራኤል ሁሉ በሚመርጠው ስፍራ በአባታችሁ ፊት በሚመጣበት ጊዜ፣ ይህን ሕግ በእስራኤል ሁሉ ፊት ጮክ ብላችሁ አንብቡ። ¹²ሰምተው ተምረው አባታችሁንም እንዲፈሩ፣ የዚህንም ሕግ ቃላት ሁሉ ጠብቀው እንዲያደርጉ፣ ሕዝቡን—ወንዶችን፣ ሴቶችን፣ ሕፃናትን፣ በከተሞቻችሁም የሚኖረውን መጻተኛ—ሰብስቡ። ¹³ይህንም ሕግ የማያውቁ ልጆቻቸው፣ ለመውረስ ዮርዳኖስን የምትሻገሩላትን ምድር በምትኖሩባት ዘመን ሁሉ፣ ሰምተው አባታችሁን መፍራት ይማራሉ።”

አባታችን ኢያሱን ሾመ

¹⁴አባታችንም ሙሴን እንዲህ አለው፤ “የሞትህ ቀን ቀርቦአል። ኢያሱን ጥራና በመገናኛው ድንኳን ቅረቡ፤ እኔም እሾመዋለሁ።” ሙሴና ኢያሱም ሄደው በመገናኛው ድንኳን ቀረቡ።

¹⁵አባታችንም በደመና ዐምድ ሆኖ በድንኳኑ ተገለጠ፤ የደመናውም ዐምድ በድንኳኑ መግቢያ ቆመ። ¹⁶አባታችንም ሙሴን እንዲህ አለው፤ “ከአባቶችህ ጋራ ልትተኛ ነህ፤ ይህም ሕዝብ ተነሥቶ ወደሚገባባት ምድር ባዕዳን አማልክትን ተከትሎ ያመነዝራል፤ እኔንም ይተዋል፤ ከእነርሱም ጋራ የገባሁትን ኪዳን ያፈርሳል። ¹⁷በዚያም ቀን ቍጣዬ በእነርሱ ላይ ይነድዳል፤ እተዋቸዋለሁ፤ ፊቴንም ከእነርሱ እሰውራለሁ፤ እነርሱም ይበላሉ። ብዙ መቅሠፍቶችና መከራዎች ይደርሱባቸዋል። በዚያም ቀን፣ ‘እነዚህ መቅሠፍቶች የደረሱብን አምላካችን ከእኛ ጋራ ስለሌለ አይደለምን?’ ይላሉ። ¹⁸በዚያም ቀን፣ ወደ ሌሎች አማልክት በመዞር ስላደረጉት ክፋት ሁሉ፣ ፊቴን ፈጽሞ እሰውራለሁ።

¹⁹አሁንም ይህን መዝሙር ለራሳችሁ ጻፉ፤ ለእስራኤላውያን አስተምሩት፤ በአፋቸውም አኑሩት፤ ይህ መዝሙር በእስራኤላውያን ላይ ለእኔ ምስክር ይሆን ዘንድ። ²⁰ለአባቶቻቸው የማልሁላትን፣ ወተትና ማር የምታፈስሰውን ምድር ባስገባኋቸው ጊዜ፣ ይበላሉ፤ ጠግበውም ይወፍራሉ፤ ወደ ሌሎች አማልክትም ዘወር ብለው ያገለግሏቸዋል፤ እኔንም ይንቃሉ፤ ኪዳኔንም ያፈርሳሉ። ²¹ብዙ መቅሠፍቶችና መከራዎች ባገኟቸው ጊዜ፣ ይህ መዝሙር ምስክር ሆኖ ይጋፈጣቸዋል፤ ምክንያቱም ከዘሮቻቸው አፍ አይረሳምና። ሊሰጣቸው ወደ ማልሁላት ምድር ሳላስገባቸው፣ ዛሬ የሚያስቡትን አውቃለሁና።”

²²ሙሴም በዚያኑ ቀን ይህን መዝሙር ጽፎ ለእስራኤላውያን አስተማረው።

²³አባታችንም የነዌን ልጅ ኢያሱን አዘዘው፤ “ጠንክር፤ ደፋርም ሁን፤ ሊሰጣቸው ወደ ማልሁላት ምድር እስራኤላውያንን ታስገባለህና፤ እኔም ራሴ ከአንተ ጋራ እሆናለሁ።”

²⁴ሙሴም የዚህን ሕግ ቃላት ከመጀመሪያ እስከ መጨረሻ በመጽሐፍ ጽፎ በጨረሰ ጊዜ፣ ²⁵የአባታችንን የኪዳን ታቦት የሚሸከሙትን ሌዋውያን እንዲህ ብሎ አዘዛቸው፤ ²⁶“ይህን የሕግ መጽሐፍ ውሰዱ፤ በአባታችሁ የኪዳን ታቦት ጎን አኑሩት፤ በእናንተ ላይ ምስክር ሆኖ በዚያ ይኑር። ²⁷ዐመፃችሁንና ዐንገተ ደንዳናነታችሁን አውቃለሁና። ዛሬ በሕይወት ከእናንተ ጋራ ሳለሁ እንኳ በአባታችን ላይ ዐምፃችኋል፤ ከሞቴ በኋላማ ይልቁን እንዴት ይሆን! ²⁸እነዚህን ቃሎች ለእነርሱ እናገር ዘንድ፣ ሰማይንና ምድርንም በእነርሱ ላይ ምስክር እንዲሆኑ እጠራ ዘንድ፣ የነገዶቻችሁን ሽማግሌዎችና ሹማምት ሁሉ ወደ እኔ ሰብስቡ። ²⁹ከሞቴ በኋላ ፈጽሞ እንደምትበላሹና ካዘዝኋችሁ መንገድ ፈቀቅ እንደምትሉ አውቃለሁና። በመጨረሻውም ዘመን መቅሠፍት ይደርስባችኋል፤ ምክንያቱም በአባታችን ፊት ክፉ የሆነውን በማድረግ፣ በእጆቻችሁ ሥራ ታስቈጡታላችሁና።”

³⁰ሙሴም የዚህን መዝሙር ቃላት ከመጀመሪያ እስከ መጨረሻ ለእስራኤል ጉባኤ ሁሉ ተናገረ።