Jawabin Bankwana na Musa

Yana da shekara ɗari da ashirin, Musa ya miƙa aikin: Ubanmu yana gabanku kuma ba zai taɓa barinku ba, Yoshuwa zai yi jagora. An rubuta dokar, za a riƙa karanta ta da babbar murya kowace shekara ta bakwai ga kowa har da yara. An koyar da waƙa, domin ya sani za su juya baya.

Babi na 31.

Sai Musa ya tafi, ya faɗa wa dukan Isra'ila waɗannan maganganu. Ya ce musu, “Yau ina da shekaru ɗari da ashirin; ba zan ƙara iya fita in shiga ba, Ubanmu kuwa ya gaya mini, ‘Ba za ka ƙetare wannan Urdun ba.’ Ubanku da kansa zai ƙetare a gabanku; zai hallaka waɗannan al'ummai a gabanku, ku kuwa za ku kore su. Yoshuwa zai ƙetare a gabanku, kamar yadda Ubanmu ya faɗa. Ubanmu zai yi musu kamar yadda ya yi wa Sihon da Og, sarakunan Amoriyawa, da ƙasarsu, sa'ad da ya hallaka su. Ubanmu zai ba ku su, dole kuwa ku yi musu daidai yadda na umarce ku. Ku yi ƙarfin hali, ku kuma yi jaruntaka. Kada ku ji tsoronsu, kada kuma ku firgita, gama Ubanku yana tafiya tare da ku; ba zai taɓa rabuwa da ku ba, ba kuma zai yashe ku ba.”

Musa ya kira Yoshuwa, ya ce masa a gaban dukan Isra'ila, “Ka yi ƙarfin hali, ka kuma yi jaruntaka—kai za ka tafi da mutanen nan zuwa ƙasar da Ubanmu ya rantse wa kakanninsu zai ba su, kai kuwa za ka ba su ita gādo. Ubanmu da kansa yana tafiya a gabanka; zai kasance tare da kai. Ba zai taɓa rabuwa da kai ba, ba kuma zai yashe ka ba. Kada ka ji tsoro; kada ka karaya.”

An Danƙa Shari'a ga Isra'ila

Musa ya rubuta wannan shari'a, ya ba da ita ga firistoci, 'ya'yan Lawi, waɗanda suke ɗauke da akwatin alkawarin Ubanmu, da kuma ga dukan dattawan Isra'ila. Sai Musa ya umarce su, “A ƙarshen kowace shekara bakwai, a ƙayyadadden lokacin shekarar saki, a lokacin Bikin Bukkoki, ^a sa'ad da dukan Isra'ila suka zo gaban Ubanku a wurin da ya zaɓa, ku karanta wannan shari'a da ƙarfi ga dukan Isra'ila. Ku tara mutane—maza, da mata, da yara, da baƙon da yake zaune a garuruwanku—domin su ji, su koya, su kuma ji tsoron Ubanku, su kuma kiyaye su aikata dukan maganganun wannan shari'a. Sa'an nan 'ya'yansu, waɗanda ba su san wannan shari'a ba, za su ji ta, su kuma koyi jin tsoron Ubanku dukan kwanakin da kuke zama a ƙasar da kuke ƙetare Urdun domin ku mallake ta.”

Ubanmu ya Naɗa Yoshuwa

Ubanmu ya ce wa Musa, “Mutuwarka ta kusa. Ka kira Yoshuwa, ku kuma gabatar da kanku a tentin sujada; zan naɗa shi.” Sai Musa da Yoshuwa suka tafi, suka gabatar da kansu a tentin sujada.

Sai Ubanmu ya bayyana a cikin tentin a cikin ginshiƙin girgije, ginshiƙin girgije kuwa ya tsaya a bakin ƙofar tentin. Ubanmu kuwa ya ce wa Musa, “Ga shi kana gab da kwanta tare da kakanninka. Mutanen nan kuwa za su tashi su yi karuwanci da baƙin allolin ƙasar da suke shiga, suna yashe ni, suna kuma karya alkawarin da na yi da su. A ranan nan fushina zai ƙuna a kansu. Zan yashe su, in ɓoye fuskata daga gare su, za a kuwa cinye su. Masifu da wahaloli masu yawa za su auko musu. A ranan nan za su ce, ‘Ashe, ba don Allahnmu ba ya tare da mu ba ne waɗannan masifu suka auko mana ba?’ Lalle zan ɓoye fuskata a ranan nan, saboda dukan muguntar da suka aikata, da suka juya ga waɗansu alloli.

Yanzu ku rubuta wannan waƙa dominku, ku koya wa Isra'ilawa ita, ku sa ta a bakunansu, domin waƙar nan ta zama mini shaida a kan Isra'ilawa. Sa'ad da na kawo su cikin ƙasar da take zub da madara da zuma, wadda na rantse wa kakanninsu, za su ci, su ƙoshi su kuma yi ƙiba, su juya ga waɗansu alloli su bauta musu, su rena ni, su kuma karya alkawarina. Sa'ad da masifu da wahaloli masu yawa suka auko musu, wannan waƙa za ta tunkare su kamar shaida, gama ba za a manta da ita a bakunan zuriyarsu ba. Gama na san abin da suke ƙullawa a yau, kafin in kawo su cikin ƙasar da na rantse zan ba su.”

Saboda haka Musa ya rubuta wannan waƙa a ranan nan, ya kuma koya wa Isra'ilawa ita.

Sai Ubanmu ya naɗa Yoshuwa ɗan Nun, ya ce, “Ka yi ƙarfin hali, ka kuma yi jaruntaka—kai za ka kawo Isra'ilawa cikin ƙasar da na rantse zan ba su, ni kuwa da kaina zan kasance tare da kai.”

Sa'ad da Musa ya gama rubuta maganganun wannan shari'a a cikin littafi, daga farko zuwa ƙarshe, sai ya umarci Lawiyawan da suke ɗauke da akwatin alkawarin Ubanmu, ya ce, “Ku ɗauki wannan Littafin Shari'a, ku sa shi a gefen akwatin alkawarin Ubanku, yă kasance a can shaida a kanku. Gama na san tawayenku da taurin kanku. Ko yanzu ma, tun ina da rai tare da ku a yau, kun yi wa Ubanmu tawaye—balle kuwa bayan mutuwata! Ku tara mini dukan dattawan kabilunku da shugabanninku, domin in faɗa musu waɗannan maganganu, in kuma kira sama da ƙasa su zama shaida a kansu. Gama na sani bayan mutuwata za ku ɓaci sarai, ku kuma juya daga hanyar da na umarce ku. A kwanaki masu zuwa kuwa masifa za ta auko muku, domin za ku aikata mugunta a gaban Ubanmu, kuna sa shi fushi ta wurin aikin hannuwanku.”

Musa ya furta maganganun wannan waƙa, daga farko zuwa ƙarshe, ga dukan taron Isra'ila.